کراچی۔ 05 اگست (اے پی پی) پاکستان پیپلزپارٹی نا چیئرمین بلاول بھٹو زرداری پارینے کہ بھارت نا غیرکانودی کوزہ ٹی جموں وکشمیر اٹی جور و بربریت ناکل چم آتے آزمائفینے، ولے مظلوم کشمیری تا جہدءِ حق خودارادیت ءِ توننگ اٹ پورو وڑاٹ بے سہب مسنے۔ میڈیا سیل بلاول ہاؤس نا کنڈآن جاری بیان نا رداٹ پی پی پی چیئرمین یوم استحصال کشمیر نا وخت آ تینا کلہو اٹی پارے کہ بھارت تینا آئین نا آرٹیکل 370 و A35نا منسوخی نا کمک اٹ دنیا ءِ داکلہو تس کہ او ریاستی ظلم آ یخین تخک۔ اوپارے کہ بھارت نا ہندا گام انا مسخت بھارت نا غیرکانودی کوزہ ٹی جموں وکشمیر اٹی کشمیری تا گیشتری ءِ اقلیت اٹ بدل کننگ ءِ۔ اوپارے کہ 5 اگست 2019 آ بھارت نا کنڈآن چست کروک آ گام اقوام متحدہ نا قرارداد و جہانی کانود نا اسُل خلا ف ورزی ءِ۔ چیئرمین بلاول بھٹو زرداری پارےکہ پاکستان پیپلزپارٹی غٹ جہانی فورم تیا کشمیری الس نا حق انا وکالت نا تینا عزم آ ثابت گام ءِ۔ نن جہانی برادری آن خواست کینہ کہ او کشمیراٹی انسانی حق انا سنگین خلاف ورزی تتون مون تننگ کن دمدستی و گچین گام گیج کے و کشمیری الس نا حق خودارادیت نا مخ تفی ءِ کے دُن کہ اقوام متحدہ نا چندی قراردادآتیٹی نوشتہ ءِ۔ چیئرمین بلاول بھٹو زرداری کشمیری الس نا عزم و بہادری ءِ خراج تحسین پیش کرسا پارے کہ کشمیری الس نا جہد انصاف، وقار و آجوئی نا جہد ءِ۔ ببو جور و استحصال آن پاک ، روشناآخبت اسے نا پٹنگ اٹ اوفتے تون تفنگ کن دوپہ دو مرین۔
