بنجائی وزیر داخلہ محسن نقوی تون وزیراعظم آزاد کشمیر نا اوڑدہی، بھارت نا غیرکانودی کوزہ ٹی جموں وکشمیر نا الس تون یکجہتی نا درشان

اسلام آباد۔ 05 اگست (اے پی پی) بنجائی وزیر داخلہ محسن نقوی تون وزیراعظم آزاد کشمیر چوہدری انوارالحق اوڑدہی کرے ہراٹی تین پہ تینی است خواہی نا امور و امن وایمنی نا حالیت آتیا گپ وتران کننگا۔ محسن نقوی و انوارالحق یوم استحصال کشمیر آ بھارت نا غیرکانودی کوزہ ٹی جموں وکشمیرنا الس تون پورو یکجہتی نا درشانی ءِ کریر۔ ہڑتوم آ راہشونک بھارت نا 5 اگست 2019 نا غیرکانودی گام انا ترندی اٹ مذمت ءِ کریر۔ وزیرداخلہ محسن نقوی نا پاننگ ئس کہ آزادکشمیر پاکستان نا شہ رگ ءِ۔ بھارت اقوام متحدہ نا قرارداد و جہانی کانود نا پاش آن پاش خلاف ورزی ءِ کرسا آرٹیکل 370 و (A) 35 ءِ چٹفسا کشمیری تا بدترین استحصال  ءِ کرے۔ تدوک آ پنچ سال آن بھارت نا غیرکانودی کوزہ ٹی جموں وکشمیر اٹی کرفیو و دفعہ 144 نافذ ءِ۔ 5 سال اٹی کیہی ہزار بے گناہ کشمیری تے شہید کننگانے، ہرافتے ٹی چنا، بزرگ و زالبول آک اوار ءُ۔ اوپارے کہ اینو مچ آ قوم پرعزم وڑاٹ یوم استحصال کشمیر اڈتننگ ءُ۔ سویلی ایشیاٹی پائیدار امن جموں وکشمیر نا تنازعہ نا ایسری تون گنڈوک ءِ۔ وزیراعظم آزاد کشمیر پارے کہ 5 اگست آدنیا نا مون آ ہندوستا ن نا مکروہ دروشم بے نقاب مس۔ بھارت نا غیرکانودی کوزہ ٹی جموں وکشمیر اٹی جہانی تنظیم تتون اوار جہانی میڈیا نا ہم داخلہ ءِ منع کننگانے۔ وخت بسنے کہ جہانی برادری، اقوام متحدہ و انسانی حق انا تنظیم  جموں وکشمیر اٹی مروک آناانصافی و ظلم ءِ تورر۔ وزیرداخلہ محسن نقوی آزاد کشمیر اٹی امن کن ہرممکن کمکاری نا باوری کرفے۔ اوناپاننگ ئس کہ آزاد کشمیر اٹی امن کن مہالو ہم پبی کمک کرین۔ آخبت ہم کمکاری ءِ برجاتخنہ۔ آزاد کشمیر نا سیکورٹی نا بابت گرج آتے پورو کننگک۔ وزیراعظم آزاد کشمیر امن کن کمکاری آ وزیرداخلہ محسن نقوی نا منت واری ءِ ہرفے۔