اسلام آباد۔ 05 اگست (اے پی پی) بنجائی وزیر داخلہ محسن نقوی پارینے کہ 5 اگست مقبوضہ جموں وکشمیر نا تاریخ نا تہارانگا دے ءِ، بھارت 2019 اٹی ہندادے آ غیرکانودی و اسہ کنڈی گام کرسا کشمیرنا حیثیت ءِ بدل کرے ہرانا سخت لوز آتیٹی مذمت ءِ کینہ، 5 اگست آ دنیا نا مون آ نئے بیرہ بھارت نا مکروہ دروشم بے نقاب مس بلکن کشمیری تیا چٹپروک آ ظلم ہم غٹ انا مون آ پیدوار مس۔ دوشنبے نادے آ تینا کلہو اٹی وزیرداخلہ پارے کہ کشمیری الس نا جہد ءِ سلام پیش کینہ۔ اوپارے کہ بھارت کشمیری تا سپیشل اسٹیٹس ءِ پلسا انسانیت نا برخلاف ڈوہ و کشمیری قوم انا شناخت ءِ چٹفنگ نا سازش کرے۔ اونا پاننگ ئس کہ کشمیری ورناتے ہڑدے جعلی مقابلہ و پن انا سرچ آپریشن تیٹی عدالت آن ایڑتر شہید کننگ انگ ءِ، کشمیری سرکڑدہ غاک بندی ءُ۔ اوپارے کہ مقبوضہ جموں وکشمیر دنیا نا غٹ آن بھلا زندان اٹ بدل مسنے ، بھارت نا غٹ تر ظلم کشمیری تا جوزہ آجوئی ءِ ماند کننگ کتو۔ اوپارے کہ مقبوضہ کشمیر نا تنکی جہانی برادری نا بے حسی نا نوحہ ءِ، جہانی برادری ءِ کشمیری الس نا توار آ بیدار مروئی تمک، انشاء اللہ کشمیری ایلم و ایڑھک آجوئی نا سہب ءِ ضرور خنرہ۔ محسن نقوی پارےکہ پاکستانی حکومت و الس کشمیری ایڑھ وا یلم تتون ہرپڑآ سلوک ءُ و ہرفورم آاوفتا اخلاقی ، سیاسی و سفارتی کمکاری ءِ برجاتخرہ۔
