اسلام آباد۔ 05 اگست (اے پی پی)نائب وزیراعظم و وزیرخارجہ سینیٹر محمد اسحاق ڈار پارینے کہ کشمیری الس نا است خواہی تا برخلاف ہچ ءُ فیصلہ اسے منپنہ، پاکستان ہرفورم آ کشمیرنا ویل ءِ پبی وڑاٹ ہرفینے، بھارت اینو آن 5 سال مست تینا آئین اٹی ترمیم کرسا تینٹ اسہ غیرآئینی گام اس کرینے۔ نائب وزیراعظم داخیال آتا درشانی ءِ دوشنبے نادے آ داڑے ‘‘یوم استحصال کشمیر’’ نا وخت آبنجائی دارالحکومت اسلام آباد اٹی کشمیر یکجہتی ریلی آن تران کرسا کرے۔ داوخت آ بنجائی وزیر امور کشمیر و گلگت بلتستان انجینئر امیر مقام ، چندی سیاسی جماعت آتیان تعلق تخوک آ راہشون و کارندہ غاتیان بیدس کل جماعتی حریت کانفرنس نا راہشونک ہم ساڑی ئسر۔ نائب وزیراعظم سینیٹر محمد اسحاق ڈار پارے کہ پاکستان حق خودارادیت کن برسر جہد کشمیری تا سیاسی، سفارتی و اخلاقی مخ تفی ءِ برجاتخک۔ اوپارےکہ اگہ بھارت ہنداخہ جمہوریت نا دعویدار ءِ تو او جموں وکشمیر اٹی دمدستی وڑاٹ رائے شماری کرفنگ نا پڑو کے، بھارتی ظلم و غیرآئینی گام گیج کشمیری تا حوصلہ ءِ شیف شاغنگ کپک، بھارت نا غیرآئینی گام گیج نا مسخت علاقہ نا ڈیموگرافی ءِ بدل کننگ ءِ۔ اوپارے کہ پاکستان کشمیر نا ویل آنبار غزہ نا مسلمان، ہراڑے 40 ہزار بندغ شہید مسنو، کن ہم ہرفورم آ توار بڑزکرینے۔ نائب وزیراعظم و وزیرخارجہ پارے کہ بھارت نا غیرکانودی کوزہ ٹی جموں وکشمیر اسہ دے پاکستان تون اوار مریک ۔ داکان مست ‘‘یوم استحصال کشمیر’’ نا وخت آ بنجائی دارالحکومت اسلام آباد اٹی دفترخارجہ غان دوشنبے نادے آ اسہ ریلی اس کشنگا ہرانا کماشی ءِ سیکرٹری خارجہ محمد سائرس سجاد قاضی کرے۔ ریلی ٹی دفترخارجہ نا آفیسر و ملازم آتون اوار زند انا چندی بشخ آتون وابستہ مخلوق بھلو کچ اسے ٹی بشخ ہلکر۔ ریلی ٹی بشخ ہلوک آک اوکان پد پارلیمنٹ نا مون آ ڈی چوک اسکان ہنار ہراڑے ریلی اسہ جلسہ سے نا دروشم ءِ اختیارکرے۔ ریلی آن نائب وزیراعظم و وزیرخارجہ سینیٹر محمد اسحاق ڈار، بنجائی وزیر امور کشمیر و گلگت بلتستان انجینئر امیر مقام و ایلوفک تران کریر۔ ریلی ٹی شریک بندغ آک بھار ت نا غیرکانودی کوزہ ٹی جموں وکشمیر اٹی انسانی حق انا بھلاخلاف ورزی و5 اگست 2019 آن برجا بھارت نا اسہ کنڈی و غیرکانودی گام گیج انا مذمت ءِ کننگ کن بینرہرفیسر۔ بھارت تینا غیرکانودی کوزہ ٹی جموں وکشمیر نا جہانی کہول آ امنائی مروک جھیڑہ ئی حیثیت ءِ نزور کننگ کن اینو آن 5 سال مست اسہ کنڈی و غیرکانودی گام گیج کرے، بھارت 5 اگست 2019 آن ہلیس داتم اسکان علاقہ ٹی تینا غیرکانودی گام گیج آن جہانی کانود ، کشمیری الس نا است خواہی و جموں وکشمیر نا بارواٹی اقوام متحدہ نا سلامتی کونسل نا قرارداد آتا یکسر خلاف ورزی ءِ کننگ ءِ۔ ریلی ٹی بشخ ہلوک آک پاکستان نا داموقف نا اسہ وارولدا درشانی ءِ کریر کہ او اقوام متحدہ نا سلامتی کونسل نا تعلقدارقرارداد آتا رداٹ جموں وکشمیر نا الس نا حق خودارادیت نا دوئی کننگ کن اوفتا برجا انصاف اٹ جہد نا اخلاقی ، سفارتی و سیاسی مخ تفی ءِ برجاتخک۔
