کوئٹہ۔ 05 اگست (اے پی پی) وزیراعلیٰ بلوچستان میر سرفراز بگٹی پارینے کہ 5 اگست 2019 تاریخ نا تہار آ دے ءِ ہرادے ہندو انتہاپسند پارٹی بی جے پی بھارتی آئین آن آرٹیکل 370 وA35ءِ چٹفسا کشمیر نا خصوصی حیثیت ءِ چٹفے ، یوم استحصال کشمیر نا رداٹ تینا اسہ کلہو اسے ٹی وزیراعلیٰ پارے کہ مقبوضہ کشمیر آ بھارتی ریاستی ظلم انا سلپروک آ چرجوئی برجاءِ، ہراٹی لکھ آ بے گناہ کشمیری تے شہید کننگا و داسہ کشمیر نا خصوصی حیثیت ءِ چٹفسا کشمیری تا ڈغار تے پلسا انتہاپسند ہندوتے آباد کننگ انگ ءِ و مسلمان تا گیشتری ءِ اقلیت اٹ بدل کننگ نا کوشست کننگ انگ ءِ وکشمیری تا زند ءِ ژند کننگ انگ ءِ ۔ وزیراعلیٰ پارےکہ جہانی برادری بھارتی ریاستی ادارہ غاتا جور و ظلم انا نوٹس ءِ ہلےو ہموڑے اقوام متحدہ نا قرارداد آتا رداٹ کشمیری تے اوفتا حق استصواب رائے تننگے وزیراعلیٰ پارے کہ کشمیر پاکستان نا شہ رگ ءِ و پاکستانی و مقبوضہ کشمیری تا رشتہ بے مٹ ءِ، بھارت مدام ہندا کوشست کرے کہ مقبوضہ کشمیر نا کشمیری تا است آن پاکستان نامہرومریبت ءِ چٹفنگے ولے بھارت ہر وار دا است آن دیک کہ پاکستانی و مقبوضہ کشمیری ایلم تا است اوار سرک، وزیراعلیٰ پارے کہ بلوچستان نا الس کشمیری تا حق خودارادیت نا پورو مخ تفی و تائید ءِ کیک ہراڑکن او بھارتی ریاستی جور انا برخلاف ہر فورم آ توار بڑزکرسا کیرہ ، وزیراعلیٰ پارے کہ بھارت کشمیری تاحق انا توار ءِ توننگ خواہک ہراٹی او پورو وڑاٹ بوکھلاہٹ نا گواچی مسنے دا بھارت نا خام خیالی ءِ کہ اوظلم وجور اٹ کشمیری تے اوفتا حق آن محروم کیک وزیراعلیٰ غٹ پاکستانی تیان خواست کرے کہ او یوم استحصال کشمیرآ تینا کشمیری تتون پبی یکجہتی نا درشانی ءِ کیر و مظلوم کشمیری ایلم تا توار مریر۔
