اسلام آباد۔ 05 اگست (اے پی پی) ‘‘یوم استحصال ’’ نا وخت آ بنجائی دارالحکومت اسلام آباد اٹی دفترخارجہ غان دوشنبے نادے آ یوم استحصال کشمیر ریلی اس کشنگاہرانا کماشی ءِ سیکرٹری خارجہ محمد سائرس سجاد قاضی کرے۔ ریلی ٹی دفترخارجہ نا آفیسر و ملازم آتون اوار زند انا چندی بشخ آتون وابستہ مخلوق بھلو کچ اسے ٹی بشخ ہلکر۔ ریلی ٹی بشخ ہلوک آک اوکان پد پارلیمنٹ نا مون آ ڈی چوک اسکان ہنار ہراڑےریلی اسہ جلسہ اسے نا دروشم ءِ اختیارکرے۔ ریلی ٹی شریک بندغ آک بھارت نا غیرکانودی کوزہ ٹی جموں وکشمیر اٹی انسانی حق انا بھلا خلاف ورزی و 5 اگست 2019 آن جاری بھارت نا اسہ کنڈی و غیرکانودی گام گیج نامذمت ءِ کننگ کن بینرہرفیسر۔ بھارت تینا غیرکانودی کوزہ ٹی جموں وکشمیر نا جہانی کہول آ امنا مروک متنازعہ ءِ حیثیت نزور کننگ کن اینو آن 5 سال مست اسہ کنڈی و غیرکانودی گام گیج کرے، بھارت 5 اگست 2019 آن داتم اسکان علاقہ ٹی تینا غیرکانودی گام گیج آن جہانی کانود، کشمیری الس نا است خواہی و جموں وکشمیر نا بارواٹی اقوام متحدہ نا سلامتی کونسل نا قرارداد آتا یکسر خلاف ورزی ءِ کننگ اٹی ءِ۔ ریلی ٹی بشخ ہلوک آک پاکستان نا دا موقف نا درشانی ءِ کریر کہ او اقوام متحدہ نا سلامتی کونسل نا تعلقدار قرارداد آتا رداٹ جموں و کشمیر نا الس نا حق خودارادیت نا دوئی کننگ کن اوفتا برجا انصاف اٹ جہد نا اخلاقی ، سفارتی و سیاسی مخ تفی ءِ برجاتخک۔
