فلسطین ءُ غزہ  ءِ  جاورھال ءِ سرءَ میاں اوستمانی ادارگانی ضمیر چہ واب پاد بیااَں، آئی پی پیز ءِ کپیسٹی پیمنٹ ہوار بجلی ءِ پڑءِ جیڑہ ءُ جنجالانی گیش ءُ گیواریءِ ھاترءَ کوشست کنگءَ اَں، اُلسءَ را ریلیف دیئگءِ ھاترءَ ہرچ وڑیں گامگیج کنگءَ اَنت، مزن وزیر شہباز شریف

اسلام آباد۔2اگست  (اے پی پی): مزن وزیر محمد شہباز شریف ءَ اسماعیل ہنیہ ءِ کوشءَ را ترندیءَ ایر  جتگءُ گشتگ کہ میاں اوستمانی ادارگانی فلسطین ءُ غزہ ءِ جاورھال ءِ سرءَ ضمیر چہ واب ءَ پاد اھگ لوٹاں، آئی پی پیز ءِ کپیسٹی پیمنٹ ءَ ہوار بجلی ءِ پڑءِ جیڑہ ءُ جنجالانی گیشءُگیوار ءِ ھاترءَ کوشست کتگ، اُلس ءَ را ریلیف دئیگ ءِ ھاترءَ ہرچ بوھوکیں گامگیج چست کنگءَ اَنت۔ اے ھیالانی درشانی آئیءَ جمعہ ءِ روچءَ بنجاہی کابینہ ءَ دیوان ءِ بندات ءَ تران کنانءَ کتگ۔ مزن وزیرءَ گشتگ کہ اسماعیل ہنیہ ءَ را ایران ءَ شہید کنگ بوتگ۔ پاکستان، ترکیہ، ملائیشیا ءَ ہوار  ایندگہ ملک آں اے کوشءَ را ایر جتگ۔ مزن وزیرءَ گشتگ کہ  میاں او ستمانی ادارگانی ضمیر نوں واب ءَ چہ پاد بیا اں۔ غزہ ءُ فلسطین ءَ  بدتریں تباہی بوہگءَ ایں۔ یک لاپ پُری زالبولے ءَ را شہید کنگ بوتگ۔ جمعہ ءِ نمازءَ پد اسماعیل  ہنیہ ءِ جنازہ وانگ بیت ءُ درائیں وزیر  جنازہءَ ہوار بنت۔ مزن وزیر ءَ  گشتگ کہ بجلی ءِ پدمنتگی ءِ گیشءُ گیواریءِ ھاترءَ شپءُروچ کوشست کنگءَ اَنت۔ مئے سیاست اُلسی ازمت اِنت۔ پیسرگیں مزن وزیر نواز شریف ءِ دورءَ 20،20  کلاکانی لوڈشیڈنگءَ را ہلاس کتگ۔ من سی پیک ءِ ردءَ 2015 ءَ پاکستان ءَ سرکاری کنگءِ دعوت داتگ۔ سی پیک ءِ ردءَ بجلی ءِ منصوبہ جنگ بوتگ۔ 4 اپریل ایل این جی پاورپلانٹ جنگ بوتگ ۔ 5 ہزار میگاواٹ بجلی پیداک بیت۔ اے دورءَ درستاں چہ ارزانیں  پلانٹ  جوڑ کنگ بوتگ۔ آئی ءَ گشتگ کہ  توانائی ءِ پڑ ءُ ایف بی آر ءَ را فعال کنگ ءُ کرپشن ءَ چہ پاک کنگءَ  سوبمند بوتا ں گڑا   جیڑہ ہلاس بیت۔ اُلسءِ جیڑہ ءُ جنجالاں چہ سرپد اَں۔ خیبر پختونخواہ ءَ یک حاسیں پارٹی ءِ 10 سالاں چہ حکومت ایں، آئی ءَ اھودہ منصوبہ جوڑ کتگ؟  ڈیم جوڑ کتگ؟ ءُ پن بجلی ءِ سرءَ زرکاری کتگ؟ ۔ گپ کنگ ارزان ایں ءُ  عمل کنگ مشکل ایں۔ آئیءَ گشتگ کہ بلوچستان ءَ ٹیوب ویل آنی ھاترءَ بجلی ءِ مدءَ ارباں کلدار زوال بنت۔ نوں بلوچستان ءِ ھاترءَ شمسی توانائی ءِ 70 ارب کلدارءِ منصوبہ بندات کنگ بوہگ ءَ ایں کہ آئی ءِ تہا 55 ارب کلدار بنجاہ ءُ باقی  صوبہ دنت۔بلوچستان ءِ اُلسءِ ھاترءَ دھرنہ دئیوکاں ہم توار چست کتگ۔ اے سیاست ہشکیں سیاست اِت۔ مزن وزیرءَگشتگ کہ 200 یونٹ بجلی  کارمرز کنوکاں رعایت دئیگ بوتگ۔ 500 یونٹ بجلی ء کارمرز کنوکاں  ریلیف دیئگءِ ھاترءَ چارءُ بچار کنگ ءَ اَنت۔ بجلی بل آنی ادا کنگءَ آسراتی ءِ ھاترءَ 50 ارب کلدار دیئگ بوتگ ۔ بجلی ءِ بل آنی دئیگءِ ھاترءَ رمسانی تہا 10 روچانی ریلیف دیئگ بوتگ۔ بجٹ ءَ صنعت آنی ھاترءَ بجلی ءِ نیاد ءَ 8 کلدارءُ نیم  یک یونٹءِ کمی کنگ بوتگ، ’’ ابسلوٹلی ناٹ‘‘ گوشوکانی گامگیج ءَ چہ سفارتی  سیادی ءَ را نقصان رستگ۔ بجلی ءِ نیادانی تہا کمی ءَ چہ برآمدات ءِ سرءَ حرچہ آنی تہا کمی  کئیت۔ حکومتی آئی پی پیش ءِ سرءَ گشادی ءَ کار کنگءَ اَنت، زوت  اے جیڑہ گیشءُگیوار بیت۔ باز نجی آئی پی پیز  آں وتی وام داتگ اَنت ءُ باز اے واماں دئیاں۔ اے جیڑہ ءِ سرءَ چین ءَ را  ری پروفائلنگ ءِ ھاترءَ نمدی نبشتہ کنگ بوتگ۔ چین ءِ صدر ءَ را  گندءُ نندءِ تہا درآمدی ایندھن ءِ سرءَ بجلی ءِ  پیداوار ءِ ہوالگءَ چہ سرپد کتگ۔ مزن زیر ءَ گشتگ کہ اُلسءِ جیڑہ ءُ  جنجالاں چہ سرجمءَ سرپد اں ءُ ایشی ءَ را گیشءُ گیوار کنگءِ ھاترءَ کوشست کنگءَ اَنت۔ مارا  کم  وہد ءُ گیش وہدءِ منصوبہ آنی سرءَ کارکنگ لوٹ ایت۔