اسلام آباد۔ 12 جولائی (اے پی پی) سپریم کورٹ مخصوص نشست آتا بابت درخواست آ الیکشن کمیشن و پشاور ہائی کورٹ نا فیصلہ ءِ کالعدم گوندسا پارینے کہ پی ٹی آئی مخصوص نشست آتا حقدار ءِ۔ سپریم کورٹ آف پاکستان نا چیف جسٹس قاضی فائز عیسیٰ نا کماشی ٹی 13 باسکی بنچ سنی اتحاد کونسل نا مخصوص نشست آتا بابت کیس انا فیصلہ ءِ ڈک کریسس ہراٹی چیف جسٹس قاضی فائز عیسیٰ ، جسٹس منیب اختر، جسٹس منصور علی شاہ، جسٹس اطہرمن اللہ، جسٹس عائشہ ملک، جسٹس شاہد وحید، جسٹس اظہر حسن رضوی، جسٹس یحیٰ آفریدی، جسٹس جمال مندوخیل، جسٹس محمد علی مظہر، جسٹس عرفان سعادت، جسٹس نعیم افغان و جسٹس امین الدین ئسک اوارئسر۔ چیف جسٹس پارے کہ سنی اتحاد کونسل نا درخواست آ فیصلہ 5 نا مقابلہ ٹی 8 انا گیشتری نا ءِ، فیصلہ ءِ جسٹس منصور علی شاہ نوشتہ کرینے۔ سپریم کورٹ نا کمرہ نمبر اسٹ اٹی الیکشن کمیشن نا وکیل سکندر بشیر، اٹارنی جنرل منصور اعوان و پی ٹی آئی راہشون تا ساڑی گری ٹی فیصلہ ءِ بِنفنگا۔ جسٹس منصور علی شاہ فیصلہ ءِ بنفسا سنی اتحاد کونسل نا مخصوص نشست آتا بابت الیکشن کمیشن و پشاور ہائیکورٹ نا فیصلہ غاتے کالعدم گوندا وپارے کہ الیکشن کمیشن نا فیصلہ آئین نا برخلاف ءِ۔ گچین کاری نشان نا ملپننگ سیاسی جماعت اسے گچین کاری تیٹی بشخ ہلنگ نا کانودی و آئینی حق ءِ زہمی کپک۔ پاکستان تحریک انصاف اسہ سیاسی ءُ جماعت اس ئس و ارے۔ سپریم کورٹ زالبول و اقلیت آتا مخصوص نشست آتے پی ٹی آئی ءِ تننگ نا پرمان جاری کرسا پارے کہ پی ٹی آئی مخصوص نشست آتا دوئی کننگ نا حقدارءِ، پی ٹی آئی دا فیصلہ نا 15 دے اٹی تینا اومیتدار آتا پن تا لڑاس فراوان کے۔ سپریم کورٹ نا فیصلہ نا اطلاق قومی و صوبائی اسمبلی تیامریک۔
