اسلام آباد۔ 12 جولائی (اے پی پی) سینیٹ نا قائمہ کمیٹی نجکاری ءِ پاننگانے کہ 24 ادارہ غاتا نجکاری نا فیصلہ ءِ کننگانے، پی آئی اے، روز ویلٹ ہوٹل، ہاؤس بلڈنگ فنانس کمپنی لمیٹڈ، فرسٹ وویمن بینک لمیٹڈ نا نجکاری ہندا سال پورو مننگ نا اومیت ءِ، بنجائی حکومت آن منظور مروک نجکاری پروگرام ءِ شفافیت اٹ عملی دروشم اس تننگ انگ ءِ، نجکاری نا عمل السی پیش کش نا رداٹ مننگ ءِ، و تعلقدار وزار آتیان سلاہ ہم ہلنگک۔ سینیٹ نا قائمہ کمیٹی نجکاری نا دیوان جمعہ نادے آ داڑے چیئرمین کمیٹی سینیٹر محمد طلال بدر نا کماشی ٹی پارلیمنٹ ہاؤس اٹی اڈ ہلک۔ قائمہ کمیٹی نا دیوان اٹی وزارت نجکاری و اونا ماتحت ادارہ غاتا جم کارکڑد و کاریم نا وڑوڈول آن بیدس وزارت نجکاری آن بروک آ اسہ سال نا نجکاری پروگرام نا سرجم آتاامور نا سرجمی اٹ جاچ ءِ ہلنگا۔ چیئرمین کمیٹی سینیٹر محمد طلال بدر کمیٹی نا باسک و وزارت نا نمائندہ غاتے بخیر اٹ پارسا پارے کہ کمیٹی نا باسک آک و وزارت تون اوار ی اٹ ملک انا زرگزران نا بحالی و نجکاری ناعمل ءِ شفاف آن شفاف تر کننگ کن لائحہ عمل اس اختیار کننگک، دا وزارت اسٹ انگا اومیت ءِ ہرا اگہ جوان وڑاٹ نجکاری نا عمل آ عملدرآمد کے تو ملکی زرگزران مین تیان پیش تمنگ کیک۔ اوپارے کہ حکومت آک بزنس کپسہ بلکن ادارہ غاتے ریگولیٹ کیک و داحکومت نا اولی فرض مریک کہ ہموادارہ ہرا قومی نسخان نا سوب جوڑ مرور اوفتے شونداری ناکنڈآ دننگ کےو اگہ داوڑ ممکن مرے تو داڑکن گچین لائحہ عمل اس اختیار کےو ملک ءِ نسخان آن بچفنگ مرے۔ کمیٹی نا باسک آک چیئرمین کمیٹی سینیٹر محمد طلال بدر ءِ چیئرمین کمیٹی گچین مننگ آ مبارکباد پیش کرسا پبی کمکاری نا باوری کرفے و پارے کہ سیاسی تعلقداری تینا ایڑتر مرسا ملکی شونداری و شونہالی کن کاریم اٹ کاریم کینہ۔ سیکرٹری وزار ت نجکاری قائمہ کمیٹی ءِ سرجمی اٹ حوال ترسا پارے کہ نجکاری نا امور اٹی شفافیت نا پلو نئے بیرہ حکومت و ملک اکن اہم مریک بلکن داڑآن الس نا حالیت زار ہم گچین مریک۔ اوپارے کہ بنجائی حکومت آن منظور مروک نجکاری پروگرام ءِ شفافیت اٹ عملی دروشم اس تننگ داادارہ نا کاریم ءِ۔ ادارہ نا کاریم نجکاری نا بابت پالیسی جوڑ کننگ ءِ ہرا نجکاری بورڈ اٹی پیش کننگک۔ نجکاری بورڈ سلاہ و سوج بنجائی کیبنٹ اٹ پیش کیک و بنجائی کابینہ نا منظوری آن پد اوڑآعمل بناکننگک۔ کمیٹی ءِ پاننگاکہ نجکاری ڈویژن اٹی 82 آسامی ءُ ہرافتیان 17 خورک ءُ۔ گریڈ 17 و اکان بڑزاناکل 12 آسامی ءُ۔ گریڈ اسٹ آن 16 اسکان 70 آسامی ءُ۔ نجکاری کمیشن اٹی 143 پوسٹ ءُ ہرافتیان 20 خورک ءُ۔ 24 گریڈ 17 و اوکان بڑز اناآسامی ءُ و 119 گریڈ اسٹ آن 16 نا آسامی ءُ۔ قائمہ کمیٹی ءِ نجکاری ڈویژن و نجکاری کمیشن نا بجٹ نا سرجم آتیان معلومدار کننگا۔ کمیٹی ءِ پاننگاکہ نجکاری کمیشن ءِ بجٹ حکومت نا کنڈآن تننگک۔ نجکاری کمیشن ءِ فنڈ ز بجٹ نا گرانٹ و نجکاری فنڈ انا کمک اٹ فراوان کننگک۔ قائمہ کمیٹی ءِ نجکاری کمیشن نا قیام، پالیسی فریم ورک و افعال بارواٹی ہم معلومدار کننگا۔ قائمہ کمیٹی ءِ پاننگا کہ نجکاری کمیشن نا اسہ بورڈ اسے ہرانا اسہ چیئرمین و 8 باسک مریرہ ۔ نجکاری آ اسہ کیبنٹ کمیٹی اس ہم جوڑ کننگانے ہرانا چیئرمین وزیرخارجہ امور مریک و اونا باسک آتیٹی وزیرخزانہ، وزیر واپار، وزیر توانائی ، وزیر صنعت و پیدوار و وزیر نجکاری اوار مریرہ۔
