اسلام آباد۔ 12 جولائی (اے پی پی) نیشنل ڈیزاسٹر مینجمنٹ اتھارٹی (این ڈی ایم اے ) نا نیشنل ایمرجنسی آپریشن سینٹر (این ای اوسی) پیش گوئی کرینے کہ بروک آ 3 دے تیٹی ملک انا چندی بشخ آتیٹی پِر انا گمان ءِ۔ جمعہ نادے آ این ای او سی الرٹ جاری کرساپارینے کہ پِر 50 آن 100 ملی میٹر آن زیات مننگ نا حالیت اٹ دا ہندی جل تیٹی اربن فلڈ/ترند انگانوکاپ نا سوب جوڑ مننگ کیک۔ گوجرانوالہ ، لاہور، سیالکوٹ و راولپنڈی ٹی گمانی وڑاٹ اربن فلڈ مننگ کیک وخت اس کہ گلیات، کشمیر، کوہستان ، مانسہرہ و مری ٹی لینڈ سلائیڈنگ و نوکاپ نا خطرہ ءِ۔ این ڈی ایم اے پی ڈی ایم اے و ہندی انتظامیہ ءِ مشورہ تسنے کہ او حالیت آتیا سخت نظر تخر و خطرہ نامون اٹی بروک آ آبادی نا رکھ اکن جوان گام گیج کیر ۔ الس ءِ مشورہ تننگانے کہ او اُرانا دیر انا کشنگ نا نظام ءِ برقرارتخنگ تون اوار بنائی گام گیج کیر، بند نالی یا گمانی خطرہ غاتا حوال ہندی کمامدارآتے دمدستی وڑاٹ ایتر۔ مخلوق ءِ پین مشورہ تننگانے کہ او لینڈ سلائیڈنگ والا علاقہ غاتیٹی سفر کرسا احتیاط کیر، خطرہ ٹی تموک آ کمیونٹی تے ہندی کمامدارآتا پارت آتیا عمل کننگ نا ہم مشورہ تننگانے وخت اس کہ الس ءِ پاننگانے کہ او وخت آ ڈیزاسٹر الرٹ، گائیڈ لائنز و رکھی گام گیج کن نیشنل ڈیزاسٹر مینجمنٹ اتھارٹی نا پاک این ڈی ایم اے ڈیزاسٹر الرٹ‘ موبائل ایپ ءِ ڈاؤن لوڈ کیر۔
