اسلام آباد۔ 21جون (اے پی پی) اینخو مالی سال 2016-17ءٹی جولائی آن مئی ٹی مشینری نا درآمد آتیٹی 39.97درسد نا نمان ودکی مسنے و داوخت آ 10.883ارب ڈالر مالیت نا مشینری درآمد کننگانے۔ ادارہ شماریات پاکستان (پی بی ایس) نا حساب و کتاب نا رداٹ اینخو مالی سال انا بنائی 11تُو اٹی درآمد کروک آ مشینری ٹی بجلی ودی کروک آ مشینری ، برقی ازباب وغیرہ و جوڑ جاڑی مشینری نا درآمد آتا بشخ مشینری نا جم اٹنگا قومی درآمد آتا 50 درسد نا خڑک مسنے۔ رپورٹ نا رداٹ گدرینگوک آ مالی سال انا مقابلہ ٹی جاری مالی سال اٹی بجلی ودی کروک آ مشینری نا درآمد آتیٹی 70.9 درسد نا ودکی مسنے و درآمد آتا کچ 2.839ارب ڈالر اسکان ودا وخت اس کہ برقی ازباب آتا درآمد آتیٹی 26.83درسد نا ودکی آن درآمدات 2.118 ارب ڈالر و جوڑجاڑی مشینری نا درآمد آتیٹی 69.53 درسد نا ودکی آن درآمدی بل 467.996ملین ڈالر اسکان ودا۔ مشینری نا درآمد آتیٹی ودکی آن اقتصادی و صنعتی سرجزآتا مون آ دننگ نا عکاسی مریک۔
