صوبہ بلوچستان و خیبرپختونخوا ٹی دہشت گردی نا واقعہ غاتیٹی ودکی بھلوگڑتی اسے، چیئرمین اسٹینڈنگ کمیٹی پیٹرولیم و رسورسز و سیاسی و اقتصادی امور نا ماہر سینیٹر محمد عبدالقادر

کوئٹہ۔ 28 مارچ (اے پی پی) چیئرمین اسٹینڈنگ کمیٹی پیٹرولیم و رسورسز و سیاسی و اقتصادی امور نا ماہر سینیٹر محمد عبدالقادر اسہ خصوصی بیان اسے ٹی  پارے کہ صوبہ بلوچستان و خیبرپختونخوا ٹی دہشت گردی نا واقعہ غاتیٹی ودکی بھاز گڑتی اسے۔ دا دہشت گرد آتا ٹارگٹ ملک اٹی سیاسی و زرگزرانی نزوری اتنگ ءِ۔ دہشت گرد آک جوانی اٹ بلد ءُ کہ پوسکن آ حکومت و پاکستان نا فوج اواری اٹ ملک ءِ نزوری نا فضاآن پیشن کشنگ کن مصمم ارادہ غا سلوک ءُ، زرگزرانی و سیاسی سوگوی نا دشمنک ہم پورو وڑاٹ سرگرم مسنو، چینی چاہندار آتا ساڑی آ دہشت گرد واقعہ غاتیٹی زوال حکومت پاکستان و پاکستان نا فوج ءِ  بھلو چیلنج اسے، پاکستان نا فوج و حکومت ءِ دا زموارآتے اوفتے اوفتا کروک نا سزا تروئی مریک۔ اوپارے کہ چین نا صدر شی جن پنگ پوسکن آ حکومت نا جوڑ کننگ نا دمدستی پد وزیراعظم و صدر پاکستان ءِ تہنیتی کلہو اٹی پیدوار وڑاٹ پارینے کہ اوفتا حکومت پاکستان تون سی پیک ڈٹ آتیاترندی اٹ کاریم ءِ مون آ دننگ آ امنا کرینو۔ سی پیک پاکستان نا زرگزرانی لائف لائن ءِ۔ دہشت گرد آک بھارت و اوغانستان نا حکومت  آتا سرپرستی ٹی چینی باتی تے ٹارگٹ کننگ ءُ، حکومت پاکستان و پاکستان نا فوج ءِ پین مستعدی اٹ کاریم کننگ نا گرج ءِ، دہشت گردی چٹک تو زرگزرانی سوگوی ممکن نظر بریک۔ دہشت گردی ناواقعہ غاتیان پد پاکستانی کمامدارآتاکنڈآن بیرہ مذمتی بیان تا جاری مننگ گنج اس اف، دہشت گردی نا عفریت آ پوسکن آ وڑتتون عمل کرسا مون ءِ توننگ مریک۔ اگہ حکومت و پاکستان نا فوج رتی بریبر ہم سستی نا درشانی ءِ کریر تو دہشت گرد آک پین سوگو و پین متحرک مریرہ ۔ تدوک آ سال تیٹی دہشت گرد ی نا سوب آن سی پیک ڈٹ آتیا کاریم بھاز سست روی نا گواچی ءِ۔ چیئرمین قائمہ کمیٹی مستی پارے کہ اگہ چینی باتی و انجینئر آتا رکھ اٹی پین کوتاہی کننگا تو درملکی زرکارآک پاکستان نا رخ ءِ کننگ نا جاگہ غا ایلو ملک آتا کنڈا زرکاری کننگ ءِ اولیت ایترہ۔ دہشت گرد آک چارہ کہ پوسکن آ حکومت نا زرگزرانی شونداری کن متحرک مننگ تون پیشن نا زرکارآک پاکستان آ بریرہ۔ بلوچستان و خیبرپختونخوا معدنی وسیلہ غاتیان مالا مال صوبہ اسے، پیشن نازرکارآتا بھاز زیات چکار ہندا صوبہ غاتیٹی زرکاری نا کنڈآٹیءِ، ہندا سوب آن دہشت گرد آک ہم دا صوبہ غاتیٹی مروک آ زرگزرانی سرجزآتے ٹارگٹ کننگ نا کوشست کیرہ۔