اسلام آباد۔ 28 مارچ (اے پی پی) بنجائی وزیر حوالکاری و شینکاری عطاء اللہ تارڑ پارینے کہ سوشل میڈیا غا غٹ آن بھلاچیلنج جعلی خبر آک ءُ، صحافیک سوشل میڈیا غا پک کننگ نا عمل ءِ تینا کیر۔ داہیت ءِ اوبرطانوی ہائی کمیشن نا پولیٹیکل قونصلر مس زوئی ویئر تون اوڑدہی ٹی گپ وتران کرسا پارے۔ مس زوئی ویئر مسلم لیگ (ن) ءِ حکومت نا ٹہیفنگ و عطاء اللہ تارڑ ءِ وزارت حوالکاری نا قلمدان ءِ سنبھالنگ آ مبارکبادی تس۔ اوڑدہی ٹی ہڑتوم آ ملک آتا نیام اٹ تعلقداری، میڈیا نا بشخ آتیٹی کمکاری نا مون آ دننگ تون اوار چندی امور تیا گپ وتران مس۔ بنجائی وزیر حوالکاری داوخت آگپ وتران کرسا مس انفارمیشن، ڈس انفارمیشن و فیک نیوز مچ آ دنیا نا ویل ءِ ، دافتا مون ءِ توننگ المی ءِ، اوپارے کہ سوشل میڈیا غ غٹ آن بھلا چیلنج جعلی خبر آک ءُ، صحافیک سوشل میڈیا غا پک کننگ نا عمل ءِ تینا کیر۔ اوپارے کہ سوشل میڈیا نا بابت مچ آدنیا ءِ اواری اٹ ضابطہ اخلاق تیار کروئی مریک۔ اوڑدہی ٹی فلم و راگ انا بشخ آتیٹی کمکاری آ ہم گپ وتران مس۔ مس زوئی ویئر پاکستان و برطانیہ نا نیام اٹ ہڑتوم آ کنڈآتا تعلقداری تا مون آ دننگ کن تینا پبی کمکاری نا باوری کرفے۔
