اسلام آباد۔ 28 مارچ (اے پی پی) وزیر مملکت آئی ٹی و ٹیلی کمیونیکیشن شزہ فاطمہ خواجہ تون پاکستان سافٹ ویئر ہاؤسز ایسوسی ایشن (پاشا) نا بڑزکو کہول انا ڈل اونا دفتراٹی اوڑدہی کرے۔ پاشا چیئرمین محمد زوہیب خان نا کماشی ٹی ڈل وزارت آئی ٹی نا قلمدان ءِ سنبھالنگ آ شزہ فاطمہ خواجہ ءِ مبارکبادی تس۔ پنچ شنبے نادے آ جاری کروک بیان نا رداٹ ڈل اتون گپ وتران کرسا شزہ فاطمہ پارے کہ حکومت براہ راست زرکاری و آئی ٹی ایکسپورٹ اٹی ودکی کن ہرممکن گام گیج کننگ اٹی ءِ، ورناتے جہانی آب انا تربیت و روزگار نا وارخواہی تا فراوانی کن انڈسٹری نا کمک المی ءِ، جہانی کمپنی تیکن پاکستانی آئی ٹی کسبکار گچین چوائس اس جوڑ مننگ کیک، جہانی طلب و ہندی رسینگ نا خلا ءِ پُر کننگ کن ایسوسی ایشن تینا گچین کڑد ءِ ادا کے۔ داوخت آ چیئرمین پاشا زوہیب خان پارے کہ آئی ٹی ایسوسی ایشن وزارت آئی ٹی تون ہم کوپہ زرگزرانی سوگوی ٹی تینا کڑد ءِ ادا کرسا کیک، وزیر مملکت نا ویل آتا دمدستی ایسر و آئی ٹی انڈسٹری نا مون آ دننگ نا عزم ستاکڑزک۔ داکان بیدس وزیر مملکت آئی ٹی و ٹیلی کمیونیکیشن شزہ فاطمہ خواجہ تون چیف ریگولیٹری آفیسر زونگ کامران علی ہم اوڑدہی کرے۔ اوڑدہی ٹی فائیو جی سپیکٹرم آکشن و ڈیجیٹلائزیشن نا بابت گپ وتران مس۔ اوڑدہی ٹی ممبر ٹیلی کام محمد جہانزیب رحیم ہم ساڑی ئسر۔ وزیر مملکت آئی ٹی شزہ فاطمہ تون سی ای او نیاٹیل وہاج سراج ہم اوڑدہی کرے۔ اوڑدہی ٹی ٹیلی کمیونیکیشن و فائبرائزیشن نا بابت گپ وتران مس۔
