اسلام آباد۔ 27 مارچ (اے پی پی) بنجائی وزیر ڈٹ بندی، شونداری، اصلاحات و خصوصی گام گیج احسن اقبال پارینے کہ پاکستان نا غٹ آن بھلا چیلنج زرمبادلہ نا کوڑی تیٹی ودکی ءِ، ‘‘فائیو ایز’’ زرگزران نا غٹ بشخ آتیٹی گچینی اتنگ کن بنداوی پنجر نا حیثیت تخک، ننے برآمد آتیٹی ودکی کن غٹ وسیلہ غاتے تروئی ءِ۔ داخیال آتا درشانی ءِ او تینا کماشی ٹی فائیو ایز اسٹیرنگ کمیٹی نا دیوان اٹی گپ وتران کرساکرے۔ دیوان اٹی سیکرٹری ڈٹ بندی اویس منظور سمرا، بنجائی ادارہ، وزارت وصوبائی حکومت آتا نمائندہ غاک بشخ ہلکر۔ دیوان اٹی بنجائی وزیر احسن اقبال پارے کہ فائیوایز زرگزران نا غٹ بشخ آتیٹی گچینی اتنگ کن بنداوی پنجر نا حیثیت تخک۔ فائیو ایز آ عملدرآمد اٹی غٹ وزارت آتے اواری اٹ کوشست کروئی مریک۔ ملکی زرگزران نا بابت حساب وکتاب بھاز ہولناک ءِ۔ اگہ ہندا حساب وکتاب کمپنی اسے نا مرے تو مالک آتا تغ بال کے۔ اوپارے کہ ننا جم کٹیا 7000 ارب وخت اس کہ وام و وام تا ادائیگی آ سروس آتا ادائیگی کن 8000 ارب روپئی آن زیات نا گرج تمک۔ مون تروک چیلنج آتیان عہدہ براہ مننگ کن ملک انا غٹ ادارہ غاتے مربوط کوشست، وسیلہ غاتا گچین کاریم اٹ اتنگ، اولیت آتا سہی تعین نا گرج ءِ۔ ان پٹ نا جاگہ غا آؤٹ پٹ یعنی ساڑی وسیلہ غاتا تہہ ٹی رہینگسا گچین نتیجہ غاتا دوئی کننگ آ تالان گام گیج کننگ نا گرج ءِ۔ پاکستان نا غٹ آن بھلا چیلنج ذرمبادلہ نا کوڑی تیٹی ودکی ءِ۔ اوپارے کہ برآمد آتیٹی ودکی مفننگ نا سوب آن نن ذرمبادلہ نا کوڑی تے ودفنگ اٹ بے سہب مسونن۔ ننے ذرمبادلہ نا کوڑی تیٹی ودکی کن ایکسپورٹ آ چکار کروئی ءِ۔ ننے برآمد آتیٹی ودکی کن غٹ وسیلہ غاتے تروئی ءِ۔ بروک آ8 سال آتیٹی ننے تینا برآمد آتا کچ 30 ارب ڈالر آن ودفسا 100 ارب ڈالر اسکان دننگ نا ءِ۔ گورننس اٹی گچینی و زرگزرانءِ پوسکن آوڑتتون ہم گرنچ کننگ کن نن ڈیجیٹلائزیشن ءِتینا اولیت آتیٹی اوار کرینن۔علم آ تالان زرگزران کن ڈیجیٹلائزیشن و اوڑکن انفراسٹرکچر نا ٹہیفنگ المی ءِ۔اوپارے کہ 2022 اٹی چاگڑدی بدلی آن زہمی مننگ نا سو ب آن بدترین نوکاپ و بھسکاری تون مون تروئی تما۔ جہانی ادارہ غاک پاکستان ءِ چاگڑدی بدلی آن زہمی مروک آ اولی ملک آتیٹی اورا کریر۔ چاگڑدی بدلی پاکستان کن دیر، کشت وکشار و خور انا چیلنج آتے کیہی گنا ودفینے، ننے سوز انقلاب 2 انا بنداوی اصول آتے تینا کرسا چاگڑدی، آبی و کشاری وسیلہ غاتا رکھ ءِ پک کننگ ءِ۔ اوپارے کہ توانائی نا بشخ اٹی خودکفالت و صنعتی واُرائی صارف آتیکن قابل سگ نہاد پیدواری لائخی ٹی ودکی نا سوب جوڑ مننگ کیک۔
