کوئٹہ۔ 27 مارچ (اے پی پی) کوئٹہ الیکٹرک سپلائی کمپنی (کیسکو) نا چیف ایگزیکٹیو آفیسر انجینئر شفقت علی پارینے کہ کمپنی صارف آتے زیات آن زیات آسراتی تا فراوانی کن چندی گام گیج کننگ ءِ بجلی دُز آتا برخلاف کارروائی و بل تفروک آتا بجلی ءِ کشکنگ انگ ءِ۔ روچہ مبارک نا بابرکت آ تُو اٹی روچہ تخوک آتے بے سلنگ آن بجلی ترسا نئے بیرہ کسبی زمواری تے پورو کننگ اُن بلکن روچہ تخوک آتے عبادت جوان وڑاٹ کننگ اٹی ہم کمک ملنگ ءِ ،اوپارے کہ حکومت پاکستان و وزارت توانائی پاور ڈویژن نا پارت آتے مون آتخسا سہو ر وباملنگ نا وخت آتیٹی ہیڈ آفس و غٹ سرکل آتیٹی جوڑ مانیٹرننگ سیل آن بجلی نا فراوانی نا جاچ ءِ ہلنگک و اسہ جوان ءُ ٹیم ورک اسے نا سوب آن کیسکو صارف آتے گچین آسراتی سرکننگ اٹ سرسہب مسنے۔ داخیال آتا درشانی ءِ او چارشنبے نادے آ ‘‘اے پی پی’’ تون خصوصی گپ وتران کرسا کرے۔ چیف ایگزیکٹیو آفیسر انجینئر شفقت علی پارے کہ صارف آتے پوسکن کنکشن نا دوئی کننگ کن ہم کمک فراوان کننگانے نسخان تے کم کننگ و صارف آتا رکھ ءِ پک کننگ کن کیسکو پین گام گیج آتون اوار اوار مدام صارف آتا فائدہ غاتے اولیت تسنے و ہرحال اٹ بجلی نا فراوانی و غاوتا دمدستی پوروی ءِ ممکن کرینے۔ اوپارے کہ کوئٹہ الیکٹرک سپلائی کمپنی(کیسکو) نا ٹیم مچ آ صوبہ ٹی بل تفروک و بجلی دُز آتا برخلاف بے پرخ کارروائی کننگ ءِ۔ صوبائی دارالحکومت کوئٹہ تون اوار پشین، لورالائی، سبی، خضدار و مکران آپریشن سرکلز اٹی بجلی دُز آتا برخلاف کانودی کارروائی کن چندی پولیس اسٹیشن تیٹی 4263 نوشتہی درخواست ارسال وخت اس کہ بجلی دُز آتا برخلاف داتم اسکان 587 ایف آئی آر نوشتہ مسنے ، خصوصی مہم اٹی بجلی دُز آتے جم وڑاٹ اسہ کروڑ 10 لکھ 82 ہزار 99بجلی یونٹ ڈیٹیکشن ڈنڈ انامد اٹی چارج کننگا وخت اس کہ چارج مروک بجلی یونٹ آتا نہاد کم و ود 56 کروڑ 68 لکھ 43 ہزار روپئی جوڑ مریک ہرافتیان کیسکو 52 کروڑ 42 لکھ روپئی وصول ہم کرینے۔ چیف ایگزیکٹیو آفیسر انجینئر شفقت علی پارے کہ غیرکانودی وڑاٹ چانک خلنگ کمپنی کن نسخان نا سوب جوڑ مننگ تون اوار اوار الس کن خطرہ نا سوب ہم جوڑ مننگ ءِ۔ شار اٹی بجلی نا حالیت و بجلی نسخان تے کم کننگ کن کروک آ گام گیج آتیا تران کرسا چیف ایگزیکٹیو آفیسر شفقت علی پارے کہ شار انا زیات تر بشخ اٹی بجلی نا فراوانی سوگو و شیڈول نا رداٹ ءِ۔ داڑے داہیت ءِ پہہ مننگ المی ءِ کہ مچ آ بلوچستان اٹی تسلسل اٹ بجلی نا فراوانی برجاءِ۔ نن مچ آ صوبہ ٹی بجلی دُز آتا برخلاف سخت کارروائی کننگ اُن۔ نن تینا صارف آتیان خواست کینہ کہ او نسخان تے کم کننگ اٹ ننتون کمک کیر تانکہ بلوچستان ءِ رکھ و پت انا قابل بجلی نا بے سلنگ آن فراوانی برجاءِ شار اناز رگزرانی شونداری ءِ ترند کننگ اٹ اہم کڑد ادا کرینے۔ اوپارے کہ صارف آتے پوسکن آ کنکشن نا دوئی کننگ تون اوار اوار لوڈایکسٹینشن و لوڈ ریگولرائزیشن نا وڑوڈول ءِ آسان کننگانے وپوسکن آ کنکشن نا دوئی کننگ کن فارم کمپنی نا ویب سائٹ آ دستیاب ءِ و ہر سب ڈویژن اٹی جمع کرفنگ مریک۔
