کوئٹہ۔ 27 مارچ (اے پی پی)پاکستان تحریک انصاف نا صوبائی راہشون حمزہ خان ناصر شانگلہ ٹی چینی کارندہ غاتیا جلہو و تربت اٹی پاک بحریہ نا ایئر بیس پی این ایس صدیق آ دہشت گرد آتا جلہو نا مذمت ءِ کرسا پارینے کہ پاکستانی قوم دہشت گرد آتا جلہو اٹی زوال کروک آ چینی و پاکستانی شاری تتون سلوک ءِ۔ داڑے جاری مروک اسہ بیان اسے ٹی حمزہ خان پارے کہ شانگلہ ٹی چینی شاری تیا جلہو نا مسخت پاکستان و چین نا نیام اٹ گوادر سی پیک ڈٹ و ہڑتوم آ ملک آتا نیام اٹ ہڑتوم آکنڈآتا کمکاری ٹی اڑاند شاغنگ ءِ ہراٹی ملک دشمن زموار آک بے سہب مریرہ۔ اوپارے کہ مچ آ پاکستانی قوم دہشت گرد آتا جلہو اٹی زوال کروک آ چینی و پاکستانی شاری تا خاہوت آتون ہمدردی نا درشانی ءِ کیک۔ اوپارے کہ بنجائی و صوبائی حکومت آک پاکستان اٹ کاریم کروک آ چینی شاری تا رکھ ءِ پک کننگ کن گچین و عملی گام گیج کیر و واقعہ ٹی اوار اصل دوبہ دار آتے اوفتے اوفتا کروک نا سزا تننگے۔ اوتربت ٹی پاک بحریہ نا ایئر بیس پی این ایس صدیق آ دہشت گرد آتا جلہو نا مذمت ءِ کرسا پارے کہ سیکورٹی فور س آک وخت آ کارروائی کرسا دہشت گرد آتا جلہو ءِ بے سہب کریر دہشت گرد آتون مقابلہ ٹی ایف سی نا اسہ ورناس شہید مش۔ اوپارے کہ پاکستانی الس دہشت گردی نا برخلاف جنگ اٹی پاک فوج و ایلو فورس آتون ہم کوپہ سلوک ءِ و انشاء اللہ ہمو دے مر اف ہراتم ملک آن دہشت گرد آتے پورو چٹفنگک۔
