کوئٹہ۔ 26 مارچ (اے پی پی) بلوچستان اسمبلی نا باسک آک پارینو کہ بلوچستان یونیورسٹی نا پروفیسر و ایلو ملازم آتا ویل آتا ایسری کن حکومت سنجیدگی اٹ گام گیج کننگ اٹیءِ ، استاد آک تدوک آ کیہی وخت آن تینا خواست آتا ایسر کننگ کن برانز کننگ ءُ وزیراعلیٰ بلوچستان برانز نا نوٹس ءِ ہلسا اسمبلی نا باسک آتیا تالان کمیٹی اس جوڑ کرے و اینو نن یونیورسٹی آف بلوچستان نا جوائنٹ ایکشن کمیٹی نا نمائندہ ڈل اتون اوڑدہی کن بسونن تانکہ ویل آتے گپ وتران نا کمک اٹ ایسر کننگ مرے۔ داہیت ءِ وزیراعلیٰ بلوچستان نا کنڈآن بلوچستان یونیورسٹی نا ملازم آتون مذاکرات کن جوڑ کروک 4 باسکی کمیٹی نا باسک سردار عبیداللہ گورگیج، حاجی علی مدد جتک، میر لیاقت لہڑی ئسک دوشنبے نادے آ یونیورسٹی آف بلوچستان نا جوائنٹ ایکشن کمیٹی نا باسک پروفیسر کلیم اللہ بڑیچ، نعمت اللہ کاکڑ وایلوفتے تون اوڑدہی ٹی گپ وتران کرساپاریر ، داوخت آ خدائے نذر کبدانی، ابرار جعفر، شہزادہ کاکڑ، حاجی امین مینگل، محمد رضاریکی شاہ علی بگٹی، نذیر احمد لہڑی، فرید خان اچکزئی، نعمت اللہ کاکڑ، گل جان کاکڑ و ایلوفک ہم ساڑی ئسر۔ اسمبلی نا باسک آک پاریر کہ وزیراعلیٰ بلوچستان میر سرفراز بگٹی پروفیسر نا برانز نا نوٹس ءِ ہلسا اسمبلی نا باسک آتیا تالان کمیٹی اس جوڑ کرے تانکہ او یونیورسٹی آف بلوچستان نا جوائنٹ ایکشن کمیٹی تون اوڑدہی کرسا اوفتا ویل آتے معلوم کرسااوفتا ایسری کن سلاہ پیش کننگ کیر۔ اوفک پاریر کہ پروفیسر قوم انا جوڑ کروک آک ءُ ہرا ورناچین ءِ تعلیم نا زیور آن آراستہ کننگ ءُ اوفتا ویل آتے ایسر کننگ ننا زمواری ءِ۔
