کوئٹہ۔ 26 مارچ (اے پی پی)چیئرمین اسٹینڈنگ کمیٹی پیٹرولیم و رسورسز و سیاسی و اقتصادی امور نا ماہر سینیٹر محمد عبدالقادر پارینے کہ وزیراعلیٰ بلوچستان سرفراز بگٹی مچ آ صوبہ ٹی ساڑی گھوسٹ اسکول و گھوسٹ ہسپتال آتیا چکار کے، مچ آ صوبہ ٹی جوڑ د اگھوسٹ اسکول و ہسپتال آتا سوب آن کروڑ آ روپئی ماہانہ نا نسخان ہرفوئی تمک، دا گھوسٹ اسکول و ہسپتال آتا گھوسٹ سروک آتے ہم اوفتے اوفتا کروک اسکان سرکننگ نا سخت گرج ءِ۔ اسہ مافیااس مچ آ صوبہ ٹی سرگرم ءِ و ہندن ءُ اسکول و ہسپتال ہرافتا ہچ ءُ وجود اس اف نا مد اٹی ہزار آبندغ آتا جعلی حاضری تا سوب آن قومی خزانہ ءِ کروڑ آ روپئی ماہانہ نسخان تننگ انگ ءِ۔ داڑے جاری مروک اسہ بیان اسے ٹی سینیٹر محمد عبدالقادر پارے کہ مچ آ صوبہ غان کرپشن ءِ چٹفنگ پوسکن آ حکومت نا اولی زمواری ءِ۔ اسکول و ہسپتال آتیٹی غٹ آسراتی تے وخت آ سرکننگے تانکہ مچ آ صوبہ ٹی تعلیم و جان جوڑی نا آب گچین مننگ کے، تعلیم و جان جوڑی نا بشخ خاص چکار کننگ نا حقدار ءُ، بروک آپنچ سال اٹی سی پیک ڈٹ آتا سوب آن ہندی مخلوق ءِ بھلو کچ اسے آ روزگار نا وارخواہی دُوبریک، ہندا سوب آن داہیت ءِ پک کننگےکہ ہندی آبادی زیات آن زیات ٹیکنیکل ایجوکیشن و ٹریننگ ہلیر تانکہ ہندی وڑاٹ اوفتے روزگار تننگ مرے۔ اوپارے کہ صوبہ بلوچستان اٹی پوسکن آ آسراتی تیان شپ ہسپتال مفننگ نابریبر ءِ ، ہروڑنا ناگہانی حالیت آتون مون تننگ کن ٹھپی و مریض آتے کراچی و ملک انا طول وعرض اٹ واقع ہسپتال آتیا گدریفنگک ہراڑآن ہندی مخلوق کن مشکل ودی مریک، داسہ وخت اس کہ سی پیک ڈٹ آتا سوب آن صوبہ بلوچستان مچ آ دنیا نا چکار نامرکز جوڑ مسنے ہندا سوب آن صوبہ نا وسیلہ غاتے کاریم اٹ اتنگ و اوفتا متکن آ ویل آتا ایسری ءِ پٹنگ ساڑی صوبائی حکومت نازمواری ءِ۔ چیئرمین قائمہ کمیٹی مستی پارے کہ وزیراعلیٰ سرفراز بگٹی روشناخیال مستعد و شون پسند سیاست دان تیٹی شمار مریک دہشت گرد آتون مون تننگ تون اوار اوار صوبہ نا شونداری و شونہالی نا کنڈآ چکار تخنگ نا سخت گرج ءِ، او غٹ مکتبہ فکر انا مخلوق و سیاست دان تتون اوار ہِننگ نا پبی لائخی تخک، صوبہ بلوچستان نا شونداری و شونہالی آ مستین نا حکومت آتا داخہ در چکار الوکہ ہرانا مدام گرج مسنے، صوبہ سے نا تقدیر ءِ بدل کننگ کن پنچ سال نا وخت گنج اس مفک ، اومیت کننگک کہ وزیراعلیٰ بلوچستان دےونن خواری کرسا صوبہ ءِ بے مٹ شونداری آن ہمکنار کننگ اٹ سرسہب مریک۔
