اسلام آباد۔ 25 مارچ (اے پی پی) ٹیکنالوجی خذمت آتا برآمد آتیٹی برجامالی سال انا اولیکو 8 تُو اٹی سالانہ بنداو آ 15 درسد نمو ریکارڈ کننگا۔ اسٹیٹ بینک انا حساب وکتاب نا رداٹ برجامالی سال انا اولیکو 8 تُو اٹی ٹیکنالوجی خذمت آتا برآمد آتا کچ 1.977 ارب ڈالر ریکارڈ کننگا ہرا تدوک آ مالی سال انا ہندا مد انا مقابلہ ٹی 15 درسد زیات ءُ، تدوک آمالی سال انا ہندا مد اٹی ٹیکنالوجی خذمت آتا برآمد آتیان ملک ءِ 1.720 ارب ڈالر نا زرمبادلہ دوئی مسوسس۔ فروری ٹی ٹیکنالوجی خذمت آتا برآمد آتا کچ 257 ملین ڈالر ریکارڈ کننگا ہرا تدوک آ سال فروری نا مقابلہ ٹی 32 درسد زیات ءُ، تدوک آسال فروری ٹی ٹیکنالوجی خذمت آتا برآمد آتا کچ 195 ملین ڈالر ریکارڈ کننگاسس۔ جنوری نا مقابلہ ٹی فروری ٹی ٹیکنالوجی خذمت آتا برآمد آتیٹی ماہانہ بنداو آ 3 درسد کمتی مس، جنوری ٹی ٹیکنالوجی خذمت آتا برآمد آتا کچ 265 ملین ڈالر ریکارڈ کننگا ہرا فروری ٹی کم مرسا 257 ملین ڈالر مسر۔ یات سلے کہ برجامالی سال انا اولیکو 8 تُو اٹی خذمت آتا بشخ آتا برآمد آتیان ملک ءِ 5.079 ار ب ڈالر نا زرمبادلہ دوئی مس ہرا تدوک آ مالی سال انا ہندا مد انا مقابلہ ٹی اسہ درسد کم ءُ، تدوک آمالی سال نا ہندا مد اٹی خذمت آتا بشخ انا برآمد آتا کچ 5.149 ارب ڈالر ریکارڈ کننگاسس۔
