اسلام آباد۔ 25 مارچ (اے پی پی) صدر مملکت آصف علی زرداری کوٹ ڈی واغ اتون اقتصادی و دودوربیدہ ئی تعلقداری تے ودفنگ نا گرج آ زور شاغسا پارینے کہ کوٹ ڈی واغ ءِ پاکستانی برنج، طبی و جراحی ازباب، دوائی و گوازی تا گڑاتا برآمد آتے ودفنگ نا بھاز زیات گمان ساڑی ءِ۔ ایوان صدر نا پریس ونگ انا رداٹ صدر مملکت کوٹ ڈی واغ (آئیوری کوسٹ) اٹی پاکستان نا پندار سفیر محمود اختر محمود تون اوڑدہی ٹی گپ وتران کریکہ۔ صدر مملکت آصف علی زرداری پارے کہ پاکستان نا کوٹ ڈی واغ اتون خوشگوار تعلقداری ءِ، پندار سفیر آئیوری کوسٹ اتون واپاری و اقتصادی تعلقداری تے مون آ دننگ نا وارخواہی تے پٹے۔ صدر مملکت ہڑتوم آ ملک آتا نیام اٹ سنگتی ءِ سوگو کننگ کن دودوربیدہ ئی تعلقداری تے ودفنگ نا گرج آ زور شاغا۔ اوپارے کہ پندار سفیر کوٹ ڈی واغ اتون السی رابطہ غاتے مون آ دننگ نا گمان تے ہم پٹے، او کوٹ ڈی واغ اتون ہڑتوم آکنڈآتا کمکاری ءِ پین گچین کننگ کن کوشست کے۔ صدر مملکت محمود اخترمحمود ءِ کوٹ ڈی وغ اٹی بطور پاکستانی سفیر تقرری آ مبارکبادی ہم تس۔
