ریاض۔ 13 جون (اے پی پی) سعودی عرب نا حکومت امریکی صدر ڈونلڈ ٹرمپ انا دا بیان نا خیرمقدم ئِ کرینو ہراٹی او قطر آ اسہ وار ولدا زورشاغانے کہ او دہشت گردی نا مالی کمکاری نا چرجوئی ئِ دمدستی وڑاٹ بند کے۔ العربیہ ٹی وی نا رداٹ سعودی کابینہ نا دیوان آن پد جاری کروک اسہ بیان اسے ٹی پاننگانے کہ ریاض حکومت، امریکی صدر ٹرمپ انا قطر انا بابت خواست انا خیرمقدم ئِ کیک۔ بیان اٹی پاننگانے کہ امریکی صدر اسہ وار ولدا قطرآن دہشت گردی نا فنڈنگ ئِ توننگ نا خواست کننگ تون اوار دہشت گردی نا برخلاف جنگ اٹی سعودی عرب نا خذمت و قربانی تا ستائِ کرینے۔ حکومت ناپاننگ ئِ کہ دہشت گردی نا برخلاف جنگ اٹی امریکہ و سعودی عرب نا موقف اسٹ ئِ۔ سعودی عرب دہشت گردی و انتہاءپسندی تون مون تننگ تون اوار اوار ڈیہہ ٹی دیر پا امن و سوگوی کن ہم کوشست آتے برجاتخک۔ سعودی کابینہ نا دیوان خادم الحرمین الشریفین شاہ سلمان نا کماشی ٹی مس۔ دیوان اٹی قطر انا سفارتی بائیکاٹ و امیر کویت الشیخ جابر صباح الاحمد الجابر الصباح،پاکستانی وزیراعظم محمد نواز شریف نا کنڈآکڑدہ غاتیٹی مصالحتی کوشست آتیا ہم سجفنگا۔
