کوئٹہ۔ 20 فروری (اے پی پی) چیئرمین اسٹینڈنگ کمیٹی پیٹرولیم و رسورسز و سیاسی و اقتصادی امور نا ماہر سینیٹر محمد عبدالقادر اسہ خصوصی بیان اسے ٹی پارینے کہ پاکستان توانائی نا تنکی تون مون تننگ ءِ، ہنداوڑ اٹ توانائی نا گیگ بدل بست وبند کننگ ننا بایدے اولیت آتیٹی اوار مرے تانکہ دا تنکی ملک انا پہیہ ءِ توننگ کپ۔ پاکستان و ایران نا نیام اٹ گیس پیپ لائن پروجیکٹ بھاز اہمیت تخک۔ ایران تینا علاقہ ٹی گیس پائپ لائن پروجیکٹ ءِ وخت آپورو کرینے وخت اس کہ ایران نا سیم آن اندرون ملک اسکان پاکستان دا پروجیکٹ ءِ داسکان پورو کننگ کتنے۔ اوپارےکہ ہنداسوب آن ایران پاکستان تعلقداری ہم زہمی مس وپاکستان آ 18 ارب ڈالر نا بھلو ڈنڈ اس بیٹ کننگا، پاکستان دا ڈنڈ آن بچنگ کن تینا بشخ انا گیس پیپ لائن تالان کننگ نا فیصلہ کرینے، چنانچہ اولیکو ریسہ غا گوادر آن ایران نا سیم اسکان 81 کلومیٹرا سکان گیس پیپ لائن تالان کننگک۔ 781 کلومیٹر نا ایلو ریسہ ٹی گیس پیپ لائن ءِ نواب شاہ تون ملفنگک، ایران مہالو آن شش تُو انا مہلت تسنے، اوپارے کہ پاکستان اولیکو ریسہ ٹی گوادر آن ایران اسکان گیس پیپ لائن تالان کننگ تون گوادر ءِ گیس فراوان کننگ نا بناءِ کیک و داہیت گوادر نا الس کن اسہ بھلو ٹیکی اسے آن کم اف، گوادر ءِ سی پیک ڈٹ انا بابت اہمیت دوئی ءِ، گوادر ءِ گیس فراوان کننگ آن اُرائی و کمرشل صارف آتیکن بے کچ آسانی ودی مریک، اگہ داوخت آامریکہ پاکستان ایران ڈٹ آ اعتراض کرے و ایران آ پابندی عائد کننگ نا ہیت کرے تو پاکستان 18 ارب ڈالر نا جرمانہ غان بچنگ کیک، چیئرمین قائمہ کمیٹی مستی پارے کہ اگہ امریکہ ایران آ پابندی خلنگ نا ہیت کتو تو پروجیکٹ نا پوروی نا ارٹ میکو ریسہ بناکیک۔ اودے نواب شاہ آن گنڈنگک و ولدا ملک انا مین سپلائی لائن آن کنیکٹ کننگک۔ پاکستان توانائی نا بدترین تنکی تون مون تننگ ءِ، گیس انا عدم دستیابی و ناقابل سگ بل آک لس صارف آتا کم دوہری کرسا ہلانے، پاکستان ءِ ہرحال اٹی توانائی نا ڈٹ آتے پورو کروئی مریک ورنہ ملک انا صنعتی نظام چلیفنگ ناممکن مریک۔ پاکستان نا برآمد گیس و بجلی نا نرخ آتا سوب آن مست بے کچ کم کہول آ سرمسنے۔
