پاکستان نا قطر آن ایل این جی درآمد کننگ نا کمرشل ئُ معاہدہ اسے، سیاسی حالیت آک اثرانداز مفسہ، ڈالر اٹی لین دین اٹی اڑاند و ایران آ دُوارہ پابندی عائد مننگ نا گڑتی تا سوب گیس پیپ لین ڈٹ آ کاریم مون آ ہِننگ پننگ ئِ
اسلام آباد۔ 12جون (اے پی پی) بنجائی وزیر پٹرولیم و قدرتی وسیلہ شاہد خاقان عباسی پارینے کہ پاکستان نا قطر آن ایل این جی درآمد کننگ نا کمرشل ئُ معاہدہ اسے ، سیاسی حالیت آک داڑآ اثرانداز مفسہ، غٹ صوبہ غاتا نیام اٹ آئین نا رداٹ گیس بشخ وپانٹ کننگ اُن، ڈالر اٹی لین دین اٹی اڑاند و ایران آ دُوارہ پابندی عائد مننگ نا گڑتی تا سوب گیس پیپ لین ڈٹ آکاریم مون آ ہن پننگ ئِ ، گیس انا کمرشل میٹرز آتیا خلوک آپابندی ئِ ہرفنگانے۔ گیس انا نرخ آتیٹی ہچ ئُ ودکی اس کننگ پننگ ئِ ، ساڑی حکومت نا دور اٹی سسٹم اٹی 944 ایم ایم سی ایف ڈی گیس و 32 ہزار بیرل یومیہ آن زیات تیل انا ودکی مسنے۔ سندھ اٹی تیل و گیس انا پنچ پوسکن ئُ کوڑی خننگانو۔ داخیال آتا درشانی ئِ او دوشنبے نا دے داڑے پریس کانفرنس آن تران کرسا کرے۔ بنجائی وزیر پٹرولیم و قدرتی وسیلہ پارینے کہ قطر آن نن یومیہ 600معکب فٹ ایل این جی درآمد کننگ اُن و دا ایل این جی بجلی نا بشخ ، صنعت، کھد فیکٹری، سی این جی و کیپٹو پاور نا ڈٹ آتے کن کاریم اٹ اتنگ انگ ئُ۔ داکان بیدس یخ اٹی اُرائی صارف آتے ہم ایل این جی فراوان کننگک۔ شاہد خاقان عباسی پارے کہ ساڑی حکومت نا دور اٹی تیل و گیس انا 98 پوسکن ئُ دریافت مسنے و 944 ایم ایم سی ایف ڈی گیس سسٹم اٹی اوار کننگانے۔ 466 ایم ایم سی ایف ڈی گیس پوسکن ئُ دریافت و 478 ساڑی فیلڈ آن سسٹم اٹی بسنے۔ ہنداوڑ 32 ہزار 343بیرل تیل یومیہ ہم سسٹم اٹی اوار کننگانے۔ ساڑی حکومت تینا دور اٹی تیل وگیس انا پٹنگ کن 46 پوسکن ئُ لیسن جاری کرینے۔ حیدرآباد آن اوجی ڈی سی ایل نا فیلڈ آن 285بیرل یومیہ تیل و 8.66ایم ایم سی ایف ڈی گیس، سانگھڑ اٹی پی پی ایل نا فیلڈ آن 310یومیہ تیل و 29.2 ایم ایم سی ایف ڈی گیس سندھ اٹی ایم پی سی ایل نا فیلڈ آن 21بیرل یومیہ تیل و 5ایم ایم سی ایف ڈی گیس خیبرپور اٹی اوجی ڈی سی ایل نا فیلڈ آن 20 بیرل یومیہ تیل و 15.1ایم ایم سی ایف ڈی گیس وخت اس کہ خیر پور اٹی اوایم وی نا فیلڈ آن 11.65ایم ایم سی ایف ڈی گیس دریافت مسنے۔ اوپارے کہ داتعصب سہی اف کہ گیس ودی کروک آ صوبہ غاتے کم گیس ملنگ ئِ۔ مشترکہ مفادات کونسل اٹی ہم حساب و کتاب ئِ پیش کینہ۔ درآمدی گیس آ بشخ وپانٹ نا اثر مفک۔ سوئی سدرن گیس کمپنی ئِ 2010ءٹی 1174ایم ایم سی ایف ڈی گیس ملاکہ، داسہ سوئی سدرن ئِ 1207 ایم ایم سی ایف ڈی گیس ملنگ ئِ و داٹی 7 درسد نا ودکی مسنے۔ سوئی ناردرن ئِ 2010 ءٹی 1665 ایم ایم سی ایف ڈی گیس تننگاکہ ، داسہ 1111ایم ایم سی ایف ڈی گیس تننگ انگ ئِ و دادے گیس انا فراوانی ٹی 33 درسد کمتی مسنے۔ اوپارے کہ پوسکن آکوڑی نا دریافت آن 150 ملین ڈالر نا بچت مریک۔
