اسلام آباد۔ 30 جنوری (اے پی پی) سنیارٹی نا بنداو آ الاٹمنٹ نا مون آ دننگ کن وزارت ہاؤسنگ الاٹمنٹ رولز اٹی سلاہ ئی ترمیم کن گام گیج آتا بناءِ کرے، وزارت ہاؤسنگ اینڈ ورکس بنجائی ملازم آتا آسراتی کن سرکاری ہنکین جتا کننگ نا قاعدہ ٹی ترمیم نا فیصلہ کرینے۔ دارداٹ وزارت ہاؤسنگ اینڈ ورکس نا اسہ عہدیدار اس ‘‘اے پی پی’’ ءِ پارے کہ الاٹمنٹ رولز 2002 اٹی ترمیم کن اسہ سلاہ ئی ترمیم اسے آ سجفنگ انگ ءِ ہرادے زوت آن زوت نافذ کننگک۔ اوپارے کہ وزارت ہاؤسنگ اینڈ ورکس گورنمنٹ ہاؤس الاٹمنٹ نا رول 20 ءِ چٹفنگ نا ارادہ تخک، کانود نا رداٹ ریٹائرڈ بنجائی ملازم ءِ جتا سرکاری اُرا اونا ملازمت پیشہ مار یا مسڑ نا پن آ منتقل مریک۔ اوپارے کہ ویٹنگ لسٹ ملازم آتا موقف ءِ کہ داکانود نا رداٹ سرکاری اُراءِ مون آ اولاد آ منتقل کننگ ناانصافی آ تالان ءِ انتئے کہ داڑآن سینئر ملازم آتا حق زہمی مریک۔ اونا پاننگ ئس کہ آفیسر و ملازم ریٹائرمنٹ آن مست تینا مار یامسڑ ءِ بھرتی کرفرہ و اوفتے اُراالاٹ کننگک، زہمی ملازم آتا خواست ءِ کہ اُراتا الاٹمنٹ بیرہ سنیارٹی نا اصول آ کننگے۔ اوپارے کہ ہاؤسنگ اینڈ ورکس قاعدہ ٹی اصلاحات کن اسہ کمیٹی اس ہم جوڑکریسس ہرارول 20 ءِ چٹفنگ نا سفارش کرینے۔ ولے اسٹیبلشمنٹ ڈویژن و وزارت کانود و انصاف آن سلاہ ہلنگک۔ اسہ سوج اسے نا ورندی ٹی اوپارے کہ پاکستان ورکس ڈیپارٹمنٹ (پی ڈبلیو ڈی ) تدوک آ پنچ ءُ نیم سال اٹی اسلام آباد نا چندی سیکٹرآتیٹی 2385 اُرا و فلیٹ آتا اپ گریڈیشن و تزئین و آرائش کننگانے۔ وزارت تون بنجائی دارالحکومت نا چندی سیکٹرآتیٹی کیٹیگری ون آن کیٹیگری فائیو نا 5 ہزار 253 اُرا و فلیٹس ءُ۔
