کوئٹہ۔ 30 جنوری (اے پی پی)پاکستان مسلم لیگ (ن) زالبول ونگ انا راہشون فاطمہ خان پارینے کہ مسلم لیگ (ن ) ہمو اسٹ انگا جماعت ءِ ہرا الس تون کروک آ قول آتے ہر حال اٹ پورو کیک، 8فروری آ الس شیر آ مہر خلسا شونداری نا سفر نا ولدا بناءِ کننگ ناءِ، مخالف آک اڑزان شہرت دوئی کننگ کن مسلم لیگ (ن) نا سرکڑدہ غاتیا بے جا تنقید کننگ ءُ ہرافتے بے سہبی آن بیدس ہچ ءُ ملپک۔ داہیت ءِ او سے شنبے نادے آ سریاب روڈ، جوائنٹ روڈ، جان محمد روڈ ، میکانگی روڈ، کواری روڈ، غوث آباد تون اوار ایلو علاقہ غاتیٹی پاکستان مسلم لیگ (ن) نا اومیتدار آتا گچین کاری کارنر میٹنگ آتیان تران کرساپارے۔ اوپارے کہ پاکستان مسلم لیگ (ن) ہراتم ہم برسراقتدار بسنے ملک اٹی شونداری کاریم تا جال اس تالان کرینے ہرانا پیدوار شاہدی موٹروے تا تفنگ، گوادر سی پورٹ و ایلو بھلا بھلا ڈٹ آک اوار ءُ۔ اوپارے کہ 2018 ء نا گچین کاری تیٹی اسہ سازش اسے نا رداٹ مسلم لیگ (ن) نا مینڈیٹ ءِ دُزی کرسا نابود بندغ اسے پاکستان نا الس آ مسلط کننگا ہرا الس نا ہچ ءُ خذمت اس کتنو بلکن ادارہ غاتے اسہ ایلو تون جنگ تننگ و حساس تنصیب آتیا جلہو کریر۔ اوپارے کہ الس 8 فروری آ ہموفتے وونٹ انا کمک اٹ مسترد کیر ہرا پاکستان مخالف ایجنڈاغا سلوک ءُ۔ اوپارے کہ پاکستان مسلم لیگ (ن) گچین کاری تیٹی بلوچستان تون اوار ہر چار آ صوبہ غاتیان بھلو گیشتری اسے ٹی سرسہبی دوئی کرسا دُوارہ اقتدار اٹی برسا ملک ءِ شونداری وشونہالی نا کنڈ آ دیک و الس نا ویل آتے ایسر کننگ کن اولیتی بنداوتیا گام گیج کیک۔ اوپارے کہ 8 فروری نا دے مسلم لیگ (ن) نا سرسہبی نا مستائی ءِ ترسا پاش کیک الس گچین کاری تا دے اُراتیان پیش تمسا پولنگ اسٹیشن تیا ہنسا مسلم لیگ (ن) نا اومیتدار آتا گچین کاری نشان ’’شیر‘‘ آ مہر خلسا اوفتے سرسہب کیر۔
