آستانہ۔ 09 جون (اے پی پی) چین نا صدر شی جن پنگ تینا روسی ہم منصب ولادی میر پیوٹن تون اوڑدہی ٹی شنگھائی کمکار تنظیم (ایس سی او) نا اوغانستان اٹی امن و مفاہمت نا عمل اٹی زیات بھلو کڑد انا گرج آ زور شاغانے۔ قزاخستان نا دارالحکومت آستانہ ٹی ایس سی او نا 17می سروک دیوان اٹی مروک آ دا اوڑدہی ٹی ہڑتوم آ راہشونک تین پہ تینی تعلقداری تے پین سوگو جوڑ کننگ و شنگھائی کمکار تنظیم نا کڑد ئِ ودفنگ آ ہم اتفاق کریر۔ چینی صدر پارے کہ اسہ ہندن ئُ وخت اسے ٹی ہراتم شنگھائی کمکار تنظیم ئِ پوسکن آ چیلنج آتون اوار اوار شونداری کن وارخواہی ہم دوئی مننگ ئِ و روس و چین نا نیام اٹ مواصلاتی رابطہ و کمکاری ئِ پین سوگو جوڑ کننگ المی ئِ۔ اوپارے کہ شنگھائی کمکار تنظیم نا باسک ملک آتا نیام اٹ سیوت نا مو ن آ دننگ ، علاقائی سلامتی و سوگوی ئِ برقرار تخنگ و دانشمندانہ کمکاری ئِ ودفنگ المی ئِ تانکہ شنگھائی کمکار تنظیم نا دنگ و اثرورسوخ ئِ ودفنگ مرے۔ اوشنگھائی کمکار تنظیم آ زور شاغاکہ او اوغانستان اٹی امن و مفاہمت نا عمل اٹی زیات بھلو کڑد اداکے۔ یات سلے کہ ہڑتوم آ راہشون تا نیام اٹ گدرینگوک آ تُو چین نا دارالحکومت بیجنگ اٹی بیلٹ اینڈ روڈ فورم نا وخت آہم اہم اوڑدہی مسوسس ہراٹی او تین پہ تینی اسٹریٹجک پارٹنر شپ و ہر بشخ اٹی کمکاری ئِ بڑزکو انگا کہول آ ودفنگ آن اتفاق کریسس۔