اسلام آباد ۔ 09 جون (اے پی پی) مسلم لیگ (ن) نا راہشون و وزیراعظم نا خصوصی کمکار سیاسی امور ڈاکٹر آصف کرمانی جوڈیشل کمیشن نا پیشن میڈیا تون ہیت وگپ اٹی پارے کہ وزیراعظم محمد نواز شریف کابینہ آن منظور کرفسا جے آئی ٹی کمیشن ئِ ہمو غٹ واک آتے ترفینے ہرانیب ئِ دوئی ئُ و جے آئی ٹی کمیشن دا رداٹ غیر ملک آتیان ہم کمک ہلنگ نا مجاز ئِ۔ اوپارے کہ وزیراعظم محمد نواز شریف جے آئی ٹی کمیشن ئِ نیب انا واک آتے ترسا اودے سوگو جوڑ کرے ، ن لیگ تینا غٹ تر گڑتی تا باوجود جے آئی ٹی تون پبی کمک کننگ ئِ، اوپارے کہ وزیر اعظم محمد نواز شریف نا مارک حسین نواز و حسن نواز پیشن نا ملک رہینگ انگ ئُ و استثنیٰ تخنگ نا باوجود لس شاری تیانبار احتساب تننگ ئُ و پین وخت اس ہم کمک کرسا کینہ۔ اوپارے کہ او عمران خان نا بیان ئِ خوانانے کہ انتس (ن) لیگ جماعت کیک نن ہم ہندن کینہ، وزیراعظم تون ہرچار آ صوبہ غاتیٹی شونداری و شونہالی نا کاریم ئِ کننگ ئِ ، دہشت گردی نا چٹفنگ کن جنگ کننگ ئِ ، لوڈشیڈنگ نا چٹفنگ کن کوشست کننگ ئِ، کراچی نا روشنائی تے پدی ایسونے ، بلوچستان اٹی امن ئِ پدی ایسونے۔ عمران خان خیبر پختونخوا ٹی اقتدار نا چارسال ئِ زیان کرینے کاش عمران خان ہم وزیراعظم محمد نواز شریف آن گڑاس ہیل کروسس و اونا رند اٹ ہنسا خیبر پختونخواہ ٹی شونداری و شونہالی ناگام گیج کریکہ۔ او مستی پارے کہ اودے دا ہیت انا یخین ئِ کہ وزیراعظم محمد نواز شریف ہرمسٹ آ عدالت، الس نا عدالت، و اللہ نا عدالت اٹی سرسہب مریک و سال 2018ءٹی ہم پاکستان نا اسہ وار ولدا وزیراعظم جوڑ مریک۔
