اسلام آباد+بیجنگ۔09جون (اے پی پی) چین پارینے کہ پاک چین اقتصادی راہداری نا رداٹ توانائی نا بشخ آتیٹی بناءکروک آ ڈٹ آتا پوروی آن پاکستان اٹی توانائی تنکی نا ایسری ٹی کمک رسینگک۔ دا ہیت ئِ چین انا اسہ سفارتکار اس بیجنگ اٹی اے پی پی تون ہیت وگپ اٹی پارے۔ اوپارے کہ داوخت آ پاک چین اقتصادی راہداری(سی پی) ڈٹ آ عملدرآمد جاری ئِ۔ داپروجیکٹ نا رداٹ توانائی نا چندی ڈٹ آتیا کاریم مننگ ئِ۔ اسہ سوج اسے آ اوپارے کہ سی پیک نا رداٹ توانائی نا 17 ڈٹ آتے پورو کروئی ئِ ہرافتیان 11 آ جوڑجاڑی کاریم زور وشوراٹ برجائِ۔ اوپارے کہ ساہیوال کول پاور پلانٹ نا ڈٹ سی پیک نا ارلی ہارویسٹ ڈٹ آتیٹی اوار ئس، دا پلانٹ نا ہڑتوم آ یونٹ آک کاریم نا بنائِ کرینو و داڑآن قومی گریڈ ئِ 1320 میگاواٹ بجلی فراوان کننگ انگ ئِ، داپلانٹ آ مچ آ کاریم 22توانا چنکو وخت اسے ٹی پورو مسنے و داڈٹ تخوک آ وخت آن شش توُ مست پورو کننگانے۔ اوپارے کہ ارلی ہارویسٹ ڈٹ آتیان پورٹ قاسم پاور پلانٹ و کیروٹ ہائیڈل پاور پلانٹ نا ڈٹ 2018ءاسکان پورومریک۔ دا ڈٹ آتا پوروی آن پاکستان نا الس ئِ ریلیف ملک ، ملک اٹی لوڈشیڈنگ نا چٹفنگ اٹی کمک رسینگک وخت اس کہ صنعتی و کشاری بشخ ئِ وافر کچ اٹی بجلی نا فراوان ممکن مننگ کیک۔
