پاک فوج سرسہب آپریشن اس کرسا بلوچستان اٹی بلواسطہ یا بلاواسطہ داعش نا منظم ڈھانچہ اسے نا قیام نا گچین وڑاٹ انسداد ئِ کرے
اسلام آباد۔ 08 جون (اے پی پی) پاک فوج سرسہب آپریشن کرسا بلوچستان اٹی بلواسطہ یا بلاواسطہ داعش نا منظم ڈھانچہ نا قیام نا گچین وڑاٹ انسداد ئِ کرینے۔ پنچ شنبے نا دے پاک فوج انا شعبہ تعلقات عامہ نا ڈائریکٹر جنرل میجر جنرل آصف غفور نا کنڈآن مستونگ آپریشن نا بابت جاری مستی سرجم آتاردٹ سیکورٹی فورس و انٹیلی جنس ادارہ غاک مستونگ اٹی 10 آن 15دہشت گرد آتا ساڑی گری نا اودیم احوال آتیا یکم آن مسہ جون اسکان آپریشن کریر ہراٹی کالعدم تنظیم لشکر جھنگوی العالمی نا اودیم ٹھکانہ غاتے نشانہ جوڑ کننگا۔ احوال رسینگاسس کہ کالعدم تنظیم داعش کن مواصلاتی ڈھانچہ فراوان کننگ ئِ ہرانا مسخت داعش ئِ بلوچستان اٹی اتنگ نا ئس۔ مستونگ نا 10 کلومیٹر نا علاقہ ٹی آپریشن یکم جون آن بناءکرے ہرامسہ دے اسکان برجاءسلیس۔ اودیم ٹھکانہ غاتیٹی ساڑی دہشت گرد آک مزاحمت کریر۔ 3جون آ کلیئرنس آپریشن پورو کننگا۔ اسہ ایلو نا سم کاری ٹی 2خودکش بمبار آتون اوار 12خطرناک دہشت گرد خلنگار۔ 12مئی آ مولانا عبدالغفور حیدر آ خودکش جلہو کروک آ جلہو گیر ہندااودیم ٹھکانہ غان گدریفنگاسس۔ داآپریشن اٹی 2افسر آتون اوار 5سیکورٹی کارندہ ٹھپی مسر۔ آپریشن اٹی اودیم ٹھکانہ غاتا ایب و کیب تخوک آ بارودی سرنگ آتے ہم ناکارہ جوڑ کننگا۔ داآپریشن اٹی 50کلوگرام دھماکہ خیز مواد، مسہ خودکش جیکٹ، 18گرنیڈ، 6راکٹ لانچر، 4لائٹ مشین گن، 18چنکو گن، 4سنائپررائفل، 38 وائر لیس سیٹ و پین سلہہ ہم دوئی کننگا۔ داسرسہب آپریشن آن پد پاک فوج بلوچستان اٹی بلواسطہ یا بلاواسطہ داعش نا منظم ڈھانچہ نا قیام نا گچین وڑاٹ انسداد ئِ کرینے۔ آرمی چیف جنرل قمر جاوید باجوہ مستونگ آپریشن اٹی سدرن کمانڈ انٹیلی جنس ایجنسی و فوجی ورناتا خواری آن سرسہب آپریشن کن کوشست آتا ستائِ کرے۔
