آستانہ۔ 08 جون (اے پی پی) وزیراعظم محمد نواز شریف شنگھائی کمکار تنظیم (ایس سی او) نا اسٹیٹ کونسل نا سروک آتا 17می اِرادے ئی دیوان اٹی بشخ ہلنگ کن پنچ شنبے نا دے داڑے سرمس۔ قزاخستان نا نائب وزیر خارجہ عاقل بیگ کمال دینوف و ایلو بڑزکو کمامدارآک وزیراعظم نا جم و جوش اٹ خیرمقدم ئِ کریر۔ دورہ ٹی وزیر اعظم نا سلاہکار خارجہ امور سرتاج عزیز، وزیر واپار خرم دستگیر و وزیر مملکت پٹرولیم جام کمال اوڑتون اوار ئسر۔ ایس سی او سروک دیوان نا وخت آ وزیراعظم محمد نواز شریف دیوان اٹی شرکت کن بروک آ ایلو راہشون آتون اوڑدہی کیک۔ ایس سی او سروک دیوان نا وخت آ قزاخستان اٹی جہانی نمائش ”انٹرنیشنل ایکسپو2017“ ءہم اڈ ہلیک ہراٹی پاکستان تون اوار 100 آن زیات ملک آک بشخ ہلیرہ۔ وزیراعظم محمد نواز شریف دا نمائش نا بنائی دود اٹی ہم بشخ ہلیک۔ قزاخستان نا دارالحکومت آستانہ ٹی اڈ ہلوک آ شنگھائی کمکار تنظیم نا سروک دیوان نا وخت آ پاکستان داتنظیم نا پورو باسک جوڑ مریک۔ پاکستان 2005ءآن دا تنظیم نا مبصر مسنے و او 2010ءٹی دا تنظیم نا پورو رکنیت نا درخواست تسوسس۔ پاکستان ئِ پورو رکنیت تننگ نا اصولی فیصلہ 2015ءٹی روس انا شار اوفا ٹی مروک آ ایس سی او ہیڈز آف اسٹیٹ دیوان اٹی کننگا۔ ہیڈز آف اسٹیڈ کونسل شنگھائی کمکار تنظیم نا بڑزکو انگا فیصلہ ساز ئُ ادارہ اسے ہرانا دیوان ہرسال مریک۔ دانا گدرینگوک آ دیوان ازبکستان نا شار تاشقند اٹی مسوسس۔ یات سلے کہ پاکستان نا شنگھائی کمکار تنظیم نا ایلو باسک ملک آتون تاریخی، دودوربیدہ ہی ، اقتصادی رابط غاک ساڑی ئُ۔ دا اِرا دے ئی دیوان اینو جمعہ نا دے چٹک۔
