اسلام آباد۔ 08 جون (اے پی پی) امریکہ ٹی پاکستان نا سفیر اعزاز چوہدری پاکستان و امریکہ نا نیام اٹ پت ئِ مون آ دننگ نا گرج آ زور شاغسا پارینے کہ ہڑتوم آ ملک آتون اوغانستان اٹی امن نا اڈ تننگ کن اواری اٹ کلیدی کڑد ادا کننگ نا موقع ساڑی ئِ۔ مستین اٹی تعلقداری تیٹی شیف بڑزی نا باوجود ہڑتوم آ ملک آک دیرپاامن نا مسخت آتے کن اسہ ایلو تون اواری اٹ کاریم کرینو، اوغان سروک نا کنڈآن تینا بے سہبی تا ملبہ ئِ پاکستان آ شاغنگ آن اوغانستان اٹی امن نا مسخت آتے دوئی کننگ مفک۔ اوداہیت ئِ واشنگٹن اٹی اٹلانٹک کونسل نا سویلی ایشیائی بنجاٹی” اوغانستان کن امریکی پالیسی نا علاقائی تناظر“ نا سرحال آ اسہ مذاکراہ سے آن تران کرسا پارے۔ پاکستانی سفیر گدرینگوک آ ہفتہ کابل اٹی بمب دھماکہ نا ترندی اٹ مذمت ئِ کرے ہراٹی 150 آن زیات بندغ تپاخت و چندیک ٹھپی مسوسر۔ پاکستانی سفیر پارے کہ داوڑنا واقعہ غاتیان دہشت گردی و انتہاءپسندی نا برخلاف اسیجائی چیلنج نا ننا عزم ئِ بایدے سوگوی رسینگے۔ پاکستانی سفیر پارے کہ پاکستان و امریکہ تون اوغانستان اٹی امن کن اواری اٹ کاریم کننگ نا موقع دستیاب ئِ، ہڑتوم آ ملک آتا نیام اٹ بے پتی ٹی امن نا دوئی نا مسخت اٹی پیش رفت ئِ نسخان رسینگ انگ ئِ۔ پاکستانی سفیر پارے کہ مستین اٹی تعلقداری تیٹی شیف بڑزی نا باوجود ہڑتوم آ ملک آک دیرپاامن نا مسخت آتا دوئی کن اسہ ایلو تون اواری اٹ کاریم کرینو۔ اوپارے کہ القاعدہ و داعش کون آ دہشت گرد گروپ آتون مون تروک چیلنج آتا ہڑتوم آ ملک آتے مون تروکی ئِ و دا چیلنج ہڑتوم آ ملک آتے اواری اٹ کاریم کننگ نا اسہ موقع اس تننگ ئِ۔ اعزاز چوہدری پارے کہ پاکستان اسہ پرامن، سوگو و شونہال اوغانستان اسے نا خواہندار ئِ۔ پاکستان دہشت گردی و انتہاءپسندی نا چٹفنگ نا جنگ اٹی بھلو قربانی اس تسنے۔ پاکستان دہشت گردی و انتہاپسندی نا غٹ دروشم و مظاہر آتا مذمت ئِ کیک۔ پاکستان نا برخلاف اوغان سروک نا دوبہ غاتے مسترد کرسا پاکستانی سفیر پارے کہ داوڑنا دوبہ خلنگ آن ڈیہہ ٹی امن کن ننا کوشست آ زہمی مفسہ۔ اوپارے کہ پاکستان سمجھک کہ اسہ پرامن، سوگو، و شونہال اوغانستان تون پاکستان و ڈیہہ نا امن وابستہ ئِ۔
