پاکستان دا تنظیم نا پورو باسک جوڑ مریک
اسلام آباد۔ 08جون (اے پی پی) وزیراعظم محمد نواز شریف پنچ شنبے نا سہب قزاخستان آرادہ مس ہراڑے او شنگھائی کمکار تنظیم (ایس سی او) نا اسٹیٹ کونسل نا سروک آتا 17می اِرادے ئی دیوان اٹی بشخ ہلیک۔ وزیراعظم نا سلاہکار خارجہ امور سرتاج عزیز ، وزیر واپار خرم دستگیر و وزیر مملکت پٹرولیم جام کمال اوڑتون اوار ئُ۔ ایس سی او سروک دیوان نا وخت آ وزیراعظم محمد نواز شریف دیوان اٹی بشخ ہلنگ کن ایلو راہشون آتون اوڑدہی کیک۔ ایس سی او سروک دیوان نا وخت آ قزاخستان اٹی جہانی نمائش ”انٹرنیشنل ایکسپو2017“ ٹی اڈ ہلیک ہراٹی پاکستان تون اوار 100 آن زیات ملک آک بشخ ہلیرہ۔ وزیراعظم محمد نواز شریف دا نمائش نا بنائی دود اٹی ہم بشخ ہلیک۔ قزاخستان نا دارالحکومت آستانہ ٹی اڈ ہلوک آ شنگھائی کمکار تنظیم نا سروک دیوان نا وخت آ پاکستان دا تنظیم نا پورو باسک جوڑ مریک۔ پاکستان 2005ءآن دا تنظیم نا مبصر مسنے و او 2010ءٹی دا تنظیم نا پورو رکنیت نا درخواست تسوسس۔ پاکستان نا پورو رکنیت تننگ نا اصولی فیصلہ 2015ءٹی روس انا شار اوفا ٹی مروک آ ایس سی او ہیڈز آف سٹیٹ دیوان اٹی کننگا۔ ہیڈز آف اسٹیٹ کونسل شنگھائی کمکار تنظیم نا بڑزکو انگا فیصلہ ساز ئُ ادارہ اسے ہرانا دیوان ہرسال مریک۔ دانا گدرینگوک آ دیوان ازبکستان نا شار تاشقند اٹی مسوسس۔ یات سلے کہ پاکستان نا شنگھائی کمکار تنظیم نا ایلو باسک آتون تاریخی، دودوربیدہ، اقتصادی رابطہ غاک ساڑی ئُ۔ دا اِرادے ئی دیوان اینو جمعہ نا دے چٹک۔

متعلقہ مضامینمصنف کی طرف سے مزید