اسلام آباد۔ 07جون (اے پی پی) وزیر مملکت بنجائی تعلیم و کسبی تربیت انجینئر بلیغ الرحمان پارینے کہ قائد اعظم یونیورسٹی ٹی طالب علم آتا اِرا گروپ نا جھیڑہ غان پد 7 طالب علم ئِ یونیورسٹی آن کشنگا۔ تعلیمی ادارہ غاتا تقدس آ ہچ ئُ سمجھوتہ اس مننگ کپک۔ چارشنبے نا دے ایوان بالاٹی سینیٹر سسی پلیجو و سینیٹر میر کبیر نا چکار ترفوک نوٹس نا ورندی ٹی اوپارے کہ تعلیمی ادارہ غاتا تقدس ئِ برقرار تخنگ بے کچ المی ئِ۔ قائد اعظم یونیورسٹی ٹی گدرینگوک آ دے تیٹی بے کچ است ہسون واقعہ پیش بس ہراٹی سندھ آن تعلق تخوک آ طالب علم آتا تنظیم مہران کونسل و بلوچستان آن تعلق تخوک آ طالب علم آتا تنظیم بلوچ کونسل نا نیام اٹ جھیڑہ مس و دا وخت آ سم کاری آن بیدس طالب علم آتے خل خو و لٹ آتا کمک اٹ نشانہ جوڑ کننگا و طالب علم آتے بے کچ بے دڑدی اٹ کُٹنگا۔ اگہ پولیس نیام تمیتو کہ تو کم از کم 20جان زیان مننگ کریکہ۔ اوپارے کہ 31 ٹھپی طالب علم آتے ہسپتال اٹی داخل کرفنگا وخت اس کہ چندی ٹھپی طالب علم ہسپتال آ ہم ہنتوس۔ ہرامسہ طالب علم تون پشٹول ئس، اوفتے دزگیر کننگا۔ فارغ کروک آ طالب علم آتیان پنچ انا تعلق سندھ و اِرٹ نا تعلق بلوچستان آن ئِ ۔ 18 طالب علم آتے کم از کم اسٹ یا ارٹ سمسٹرز کن یونیورسٹی آن کشنگانے۔ یونیورسٹیک وت واجہ ئُ ادارہ ئُ۔ پارلیمنٹ نا باسک آک ہم بایدے دا چرجوئی ٹی یونیورسٹی تیٹی امن و ایمنی ئِ کن تینا پبی کڑدئِ ادا کیر۔
