دیوان 8، 9 جون آ قزاخستان نا دارالحکومت آستانہ ٹی مریک، ترجمان دفترخارجہ
اسلام آباد۔ 07جون (اے پی پی) وزیراعظم محمد نواز شریف شنگھائی کمکار تنظیم (ایس سی او) نا اسٹیٹ کونسل نا سروک آتا 17می دیوان اٹی بشخ ہلیک ہرا 8و 9 جون آ قزاخستان نا دارالحکومت آستانہ ٹی اڈ ہلنگ ئِ۔ ترجمان دفترخارجہ نا کنڈآن جاری بیان نا رداٹ ایس سی او سروک دیوان نا وخت آ وزیراعظم ایلو ساڑی راہشون آتون اوڑ دہی ہم کیک۔ ایس سی او سروک دیوان آن بیدس قزاخستان انٹرنیشنل ایکسپو2017ءنا میزبانی ئِ ہم کننگ ئِ ہراٹی پاکستان تون اوار 100 آن زیات ملک بشخ ہلنگ ئُ۔ وزیراعظم ایس سی او ہیڈز آف اسٹیٹ کونسل اٹی بشخ ہلوک آ ایلو راہشون آتون اوار ایکسپو نا بنائی دود اٹی ہم بشخ ہلیک۔ بیان نا رداٹ ہیڈ آف اسٹیٹ کونسل ایس سی او نا بڑزکو انگا فیصلہ ساز ئُ ادارہ اسے ہرانا دیوان ہرسال اڈ ہلیک۔ گدرینگوک آ سروک دیوان جون 2016ءٹی تاشقند ، ازبکستان اٹی اڈ ہلکوسس۔ پاکستان آستانہ ٹی ایس سی او نا پورو باسک جوڑ مریک، دادے 2005آن ایس سی او نا مبصر نا حیثیت دوئی مسنے۔ پاکستان 2010ءٹی تنظیم نا پورو رکنیت کن درخواست تسوسس۔ پاکستان ئِ رکنیت تننگ نا اصولی فیصلہ 2015ءٹی روس انا شار اوفاٹی ایس سی او نا سروک دیوان اٹی کننگاسس۔ بیان اٹی پاننگانے کہ پاکستان ایس سی او نا چارٹرو ”شنگھائی سپرٹ“ نا پورو تائید ئِ کیک۔ مبصر نا حیثیت اٹ نن تنظیم نا سرجزآتیٹی فعال بشخ ہلنگ اُن ۔ ایس سی او علاقائی امن، سوگوی و شونداری ٹی ننا مفاد و دہشت گردی و انتہاءپسندی نا برخلاف علاقائی کمکاری کن ننا مخ تفی نا مون آ دننگ اٹی کمکار مریک۔
