مظفرآباد۔ 15 دسمبر (اے پی پی) نگران وزیراعظم انوارالحق کاکڑ پارینے کہ کشمیر وخت اس بھارت نا بشخ ئس، نئے ارے و نئے مریک، بھارتی سپریم کورٹ نا 4 بندغ تولسا کشمیری تا آجوئی نا تحریک ءِ چٹفنگ کپسہ، نن داوڑنا فیصلہ و داوڑنا کانود ءِ منپنہ ہراٹی کشمیری الس نا ہچ ءُ عمل دخل اس مف، کشمیرنا آجوئی نا تحریک نا بابت کشمیری سرکڑدہ غاتا سلابت اٹ لائحہ عمل اس جوڑ کینہ۔ کشمیری تا حق خودارادیت مسلمہ ءِ۔ جمعہ نادے آ داڑے پریس کانفرنس آن تران کرسا اوپارے کہ آزاد کشمیر نا دورہ ٹی او نا کشمیری و حریت سرکڑدہ غاتون اوڑدہی مس۔ طالب علم و کابینہ تون ہم گپ وتران مس، ہراڑآن حالیت آتے گچین وڑاٹ پہہ مننگ و جاچ ءِ ہلنگ نا موقع میسر بس۔ کنا دورہ بے کچ مثبت و تعمیری مسنے۔ آجوئی نا تحریک ءِ سوگو کننگ غٹ آن اہم ءِ۔ ہندی گورننس و ایلو باندات آتا ہم یقینا تینا اہمیت ءِ ولے ننا اصل ہدف پوروی پاکستان نا تغ و کشمیری الس نا است خواہی و است خواہی تے عملی دروشم اس تننگ ءِ۔ دا بابت دورہ ٹی اہم سلابت مس۔ اسہ سوج اسے نا ورندی ٹی وزیراعظم پارے کہ مقبوضہ کشمیر نا ہروڑنا اسہ کنڈی فیصلہ خواہ او کانود اسمبلی یا عدالت اسے نا کنڈآن مرے ہچ ءُ حالیت اسے ٹی قابل قبول اف و نئے اونا اہمیت اس ارے۔ نن داوڑنا فیصلہ و داوڑنا کانودآتے منپنہ ہراٹی کشمیری الس نا ہچ ءُ عمل دخل اس مف۔
