اسلام آباد۔ 06جون (اے پی پی) پاکستان و فن لینڈ معیشت ، واپار، تعلیم، زرکاری و سائنس و ٹیکنالوجی تون اوار چندی بشخ آتیٹی کمکاری ئِ مون آ دننگ آ اتفاق کریر۔ دا امنائی سے شنبے نا دے ہلسنکی ٹی اڈ ہلوک آ پاکستان۔فن لینڈ ہڑتوم آ کنڈآتا سیاسی صلابت نا مسٹ میکو مرحلہ ٹی خننگا۔ دفترخارجہ نا ترجمان نا رداٹ ایڈیشنل سیکرٹری (یورپ) ظہیر اے جنجوعہ پاکستان ڈل وخت اس کہ وزارت خارجہ امور فن لینڈ انا انڈر سیکرٹری آف سٹیٹ این مرجانہ فن لینڈ انا ڈل انا سروکی ئِ کرے۔ ہڑتوم آ کڑدہ غاک ہڑتوم آ کنڈآتا تعلقداری تا پوسکنی آن جاچ ئِ ہلکر و واپار، معیشت، توانائی ، تعلیم، صنعت ، زرکاری، کشت وکشار ، انفارمیشن ٹیکنالوجی، سائنس و ٹیکنالوجی ، ٹیلی کام و دودوربیدہ تون اوار چندی بشخ آتیٹی ہڑتوم آ کنڈآتا کمکاری ئِ مون آ دننگ آ اتفاق کریر۔ ایڈیشنل سیکرٹری ظہیر اے جنجوعہ وزیراعظم نواز شریف نا پرامن ہمسائیگی نا وژن نا روشنی ٹی اوغانستان و بھارت تون تعلقداری تا بابت بریف کرے و اوغانستان اٹی امن و سوگوی نا مون آ دننگ اٹی جوڑ جاڑی کڑد و کشمیر نا ویل اتون اوار غٹ ایسرنا چاری معاملہ غاتا ایسری کن بھارت تون مذاکرات آ آمادگی نا بابت پاکستان نا عزم انا اعادہ ئِ کرے۔
