اسلام آباد۔ 24 نومبر (اے پی پی) نجی بشخ ءِ بینک آتا کنڈآن وام تا فراوانی ٹی اکتوبر اٹی سالانہ بنداوتیا 0.8 درسد نا کمتی ریکارڈ کننگا۔ اسٹیٹ بینک انا کنڈآن جاری کروک حساب وکتاب نا رداٹ اکتوبر اٹی بینک آتا کنڈآن نجی بشخ ءِ تروک آ وام تا کچ 8100 ارب روپئی ریکارڈ کننگا ہرا تدوک آ سال اکتوبر نامقابلہ ٹی 0.8 درسد کم ءُ۔ تدوک آ سال اکتوبر اٹی نجی بشخ اٹی بینک آتا کنڈآن تروک آ وام تا کچ 8164 ارب روپئی ریکارڈ کننگاسس۔ ستمبر نا مقابلہ ٹی اکتوبر اٹی نجی بشخ ءِ وام تا فراوانی ٹی اسہ درسد نا نموریکارڈ کننگا۔ ستمبر اٹی نجی بشخ ءِ بینک آتا کنڈآن تروک آ وام تا کچ 8020 ارب روپئی ریکارڈ کننگاسس۔ حساب وکتاب نا رداٹ اکتوبر اٹی نجی بشخ انا کاروبار ءِ تروک آ وام تا کچ 6962 ارب روپئی ریکارڈ کننگا ہرا تدوک آ سال اکتوبر نا مقابلہ ٹی 0.7 درسد کم ءُ۔ تدوک آسال اکتوبر اٹی نجی بشخ اناکاروبار ءِ تروک آ وام تا کچ 7008 ارب روپئی ریکارڈ کننگاسس۔ ستمبر نا مقابلہ ٹی اکتوبر اٹی نجی بشخ انا کاروبار ءِ تروک آ وام تا کچ اٹی ماہانہ بنداوتیا 1.2 درسد نا نموریکارڈ کننگا۔ ستمبر اٹی نجی بشخ ءِ تروک آ وام تا کچ 6880 ارب روپئی ریکارڈ کننگاسس ہرا اکتوبر اٹی ودسا 6962 ارب روپئی مس۔
