وزیراعظم آزاد کشمیر راجہ فاروق حیدرخان نا پریس کانفرنس

آزاد کشمیر نا شونداری بجٹ ئِ دوگنا کننگ آ وزیراعظم پاکستان محمد نواز شریف نا منت وار اُن، سی پیک اٹی آزادکشمیر ئِ میر پور، منگلا، مظفرآباد، مانسہرہ روڈ و صنعتی زون اس ملانے
اسلام آباد۔ 05 جون (اے پی پی) وزیراعظم آزاد کشمیر راجہ فاروق حیدر خان پارینے کہ گچین مروک وزیراعظم ئِ غیر معروف وڑاٹ اسہ پلو کننگ نا نتیجہ غان ملک اکن جُوان مفسہ۔ پاکستان ئِ داوخت محمد نواز شریف نا گرج ئِ، 2018ءنا گچین کاری تیٹی مسلم لیگ (ن) نا پبی مہم اس چلیفک۔ جے آئی ٹی ٹی بایدے فیئر ٹرائل اس مرے۔ نواز شریف نا کنڈآن آزادکشمیر نا شونداری بجٹ ئِ دوگنا کننگ آ اونا منت واراُن۔ دوشنبے نا دے کشمیر ہاﺅس اٹی آزاد کشمیر نا وزیر اطلاعات مشتاق منہاس تون اوار پریس کانفرنس آن تران کرسا وزیراعظم آزاد کشمیر پارے کہ آزاد کشمیر نا ایکٹ 74ٹی ترمیم نا بابت سرتاج عزیز نا سروکی ٹی آئینی کمیٹی اس کاریم کننگ ئِ اومیت ئِ کہ داسال انا آخر اسکان داکاریم طے مریک۔ اسہ سوج اسے نا ورندی ٹی اوپارے کہ ننے ادارہ غاتیا پت ئِ ولے مسلم لیگ (ن) پاکستان نا ہراگڑتیک ئُ او ننا ہم اریر۔ سیاسی جماعت آک اسہ ہی نن اٹی چٹیپسہ۔ ذوالفقارعلی بھٹو ئِ پاہو تننگا ولے پیپلزپارٹی اینو ہم قائم ئُ دائم ئِ۔ 1999ءٹی مشرف مسلم لیگ (ن) اتون انت انت کرے ولے او اینو برسراقتدار ئِ۔ کشمیر کمیٹی نا کارکڑد نا بابت اسہ سوج اسے نا ورندی ٹی اوپارے کہ کشمیر کمیٹی تینا مینڈیٹ نا رداٹ ہی کاریم کیک دانا کمتی ئِ حکومت پاکستان و وزارت خارجہ امور پورو کرینے۔ کشمیری الس و حکومت نواز شریف نا پالیسی تا مخ تفی ئِ کیک۔ اوپارے کہ کلبھوشن یادیو نا معاملہ ٹی بھارت اختہ مسنے۔ حکومت داڑکن تیاری کرسا مون آ برے۔ جہانی فورم آتیا کشمیر نا ویل ئِ تالان کننگ حکومت پاکستان نا زمواری ئِ۔