اسلام آباد۔ 02جون (اے پی پی) پنی کانود دان شریف الدین پیرزادہ 93سال انا وئی ٹی جمعہ نا سہب کراچی ٹی کزیت کرے۔ او 12جون 1923ءآ مدھیہ پردیش نا شار برہان پور اٹی ودی مس۔ اونا باوہ ہم اسہ پنی ئُ بیرسٹراس ئس۔ شریف الدین پیرزادہ اِراوار پاکستان نا اٹارنی جنرل مس۔ اومسکوہی صدر پرویز مشرف نا سلاہکار نا وڑاٹ ہم خذمت انجام تس۔ اوصدر ایوب خان نا دور اٹی وزیر خارجہ نا وڑاٹ ہم زمواری سرانجام تس۔ 1985ءآن 1988ءاسکان اسلامی ملک آتا تنظیم او آئی سی نا سیکرٹری جنرل ہم مس۔ اوفتا قومی خذمت آتا اعتراف اٹی اودے 1998ءٹی نشان امتیاز تننگا۔ اونا کزیت نا سوب سندھ ہائیکورٹ اٹی غٹ بورڈ ڈسچارج کننگا و اہم مقدمہ غاتا سماعت ئِ جج آتا چیمبر اٹی کننگا۔
