اسلام آباد۔ 02جون (اے پی پی) بنجائی وزیر امور کشمیر و گلگت بلتستان چوہدری برجیس طاہر پارینے کہ پاکستان بھارت آن کشمیر نا ویل اتون اوار غٹ جھیڑہ غاتا ایسری ئِ ہیت وگپ نا کمک اٹ خوائک۔ حکومت آزاد کشمیر و گلگت بلتستان نا بنجائی شونداری بجٹ اٹی ارب آ روپئی نا ودکی کرینے۔ سی پیک نواز شریف نا 1991ءنا موٹروے نا وژن نا عکاسی ئِ۔ داڑآن ڈیہہ ٹی شونہالی بریک۔ ننادور اٹی لوڈشیڈنگ نا پورو چٹک۔ آزاد کشمیر نا حکومت ئِ فیصلہ غاتا اختیار تسنے۔ 2008 ءنا مقابلہ ٹی اینو نا پاکستان بھاز زیات شونہالی و شون ہلوک ئِ۔ تدوک آ دے ذرائع ابلاغ نا نمائندہ غاتا اعزاز اٹی تروک آ افطار ڈنر نا وخت آ ہیت وگپ کرسا وزیر امور کشمیر و گلگت بلتستان برجیس طاہر پارے کہ بھارت کنٹرول لین آ بلا اشتعال سم کاری کرے۔ مقبوضہ کشمیر اٹی سبزاربٹ ئِ شہید کننگا۔ گلگت بلتستان و آزاد کشمیر اٹی مسلم لیگ (ن) نا وژن ئِ فتح ملانے اوفتے تون وعدہ کرے کہ اسہ شونداری پیکج اس ایتنہ۔ زیات آن زیات شونداری کاریم کینہ۔ اینو اللہ نا فضل اٹ دا پاننگ کینہ کہ اخس کہ شونداری فنڈ نن بروک آ مالی سال اکن تخان مستین اٹی دانا ہچ ئُ مثال اس ملیپک۔ آزاد کشمیر کن شونداری فنڈ 12 ارب آن ودفسا 22ارب روپئی وخت اس کہ گلگت بلتستان کن 9 ارب آن ودفسا 15ارب کرین۔ گلگت بلتستان اٹی میڈیکل کالج، ٹیکنیکل کالج اس جوڑ مریک، کارڈیا لوجی سینٹر اس جوڑ مریک۔ اٹھمقام روڈ اکن 20 کروڑ، مانسہرہ روڈ اکن 30 کروڑ روپئی جتا کننگا۔ سکردوروڈ اکن وزیراعظم 8 ارب روپئی جتا کننگانے۔ اوپارے کہ نن گچین کاری تا دے تیٹی ہراوعدہ غاتے کرین وزیراعظم نواز شریف اسہ سال اٹی اوفتے پورو کرے۔ ہراتم موٹروے جوڑ مسکہ تو پیپلزپارٹی نواز شریف ئِ کرینگ تسکہ۔ داسہ نواز شریف سی پیک اس تس ہرا مسہ براعظم اسکان تالان مسنے۔ دا وژن نواز شریف نا1991ءنا تصور نا عکاسی ئِ۔
