اسلام آباد۔ 01جون (اے پی پی) ٍصدر مملکت ممنون حسین پارینے کہ بھارت ڈیہہ نا امن و سوگوی ٹی غٹ آن بھلا اڑاند ئِ ، کشمیر نا ویل انا اسٹ انگا ایسری اقوام متحدہ نا قراردادآتا رداٹ استصواب رائے ئِ، کنٹرول لین آ پدریسہ بیدادی و بے گناہ کشمیری تیا بیدادقابل مذمت ئِ، انتہاءپسندی نا چٹفنگ کن حکومت ، پارلیمنٹ نا باسک، سیاسی جماعت و علمی و پٹ وپولی ادارہ غاتے فعال کڑدادا کننگ نا گرج ئِ۔ اوغان سروک ئِ تین پہ تینی کمکاری آن سیمی نظم و نسق ئِ گچین جوڑ کننگ نا سلہ خلینہ، چین پاکستان اقتصادی راہداری ڈٹ مچ آ ڈیہہ کن شونداری و شونہالی نا ذریعہ جوڑ مریک۔ پاکستان اٹی شرح نمو گدرینگوک آ دہ سال اٹی غٹ آن بڑزکو کہول آٹی ئِ ، زرمبادلہ نا کوڑی 23ارب ڈالر آن گدرینگانے، افراط زر اٹی نمان کمتی مسنے، جہانی ادارہ غاک داگچینی نا اعتراف ئِ کننگ ئُ۔ نیزگاری نا چٹفنگ کن قومی کہول آ سخت خواری کننگ نا گرج ئِ۔ پاکستان سفارتی میدان اٹی ہم اہم سرسہبی دوئی کرینے۔ پاکستان اسلامی دنیا نا ویل آتا ایسری کن ہمیشہ مخلصانہ کڑدادا کرینے، اقوام متحدہ ئِ پین گچین و مفید جوڑ کننگ کن سلامتی کونسل اٹی اصلاحات المی ئِ۔ پنچ شنبے نا دے پارلیمنٹ نا ہڑتوم آ ایوان تا اسیجائی دیوان آن تران کرسا صدر مملکت ممنون حسین پارے کہ پاکستانی جمہوریت بھلو نشیب و فراز خنانے۔ ننا جمہوریت آزمائش نا ساہت آتیان ہم گدرینگانے و قوم انا عزم انا سوب او بھلا بھلا معرکہ ہم سرکرینے ہراٹی ننا پارلیمان نا تینا حقی مسخت آتا دوئی نا کنڈآ سرسہبی اٹ سفر برجائِ۔ دا عہد دا اعتبار آن بھاز معنہ خیز ئِ کہ بے شمار مشکل آتا سوب پارلیمنٹ تینا فیصلہ کن حیثیت ئِ نئے بیرہ برقرار تخا بلکن بے کچ شدید سیاسی اختلاف آتا باوجود قومی سیوت نا غٹ آن بھلا علامت جوڑ مرسا ہم مون آ بس، تاریخ اٹی دانا دا کڑد ئِ ہمیشہ یات تخنگک ہراڑآ ای نمے غٹ ءِ و پاکستانی قوم ئِ است انا ھب اٹ مبارکبادی ایتیوہ۔ صدر مملکت پارے کہ سیاسی و مالی ریشہ دوانی نا معاملہ غاک مریر، قومی سلامتی نا بارواٹی شک و شبہ یا پیچیدہ وڑنا ایلو ویل آک ، داغٹ انا بنداو مستین نا حالیت ، غلط فیصلہ و وختی مسخت آتا دوئی کن اختیار کروک آ پالیسیک مسنو۔ صدر مملکت پارے کہ گدرینگوک آ کیہی دہائی تیٹی بے سمت پالیسی و تدبر آن محروم طرز عمل نا سوب آن نہادی وسیلہ غاک بے دردی اٹ زیان کننگار۔ شکر انا ہند ئِ کہ داسہ احساس زیاں ہم ساڑی ارے و گڑاس کننگ نا جوزہ ہم۔ ریاست نا کاروبار زرکار دوست پالیسی، چندی براعظم آتے تین پہ تین ملفسا اسہ پوسکن ئُ دنیا نا تخلیق نا ذریعہ جوڑ مروک آ پاک چین اقتصادی راہداری و توانائی نا تنکی آن پیش تمنگ کن بجلی نا پیداوار نا ڈٹ ہنداچرجوئی نا کڑی اسے ئُ۔ صدر مملکت پارے کہ شونداری عمل و وسیلہ غاتیا حق انا چرجوئی ٹی قوم انا چندی تپہ غاتا نیام اٹ اختلاف رائے نا ودی مننگ غیر فطری آخا بلکن ای سرپند مریوہ کہ دُن انگا معاملہ غاتیٹی اختلاف رائے خیروبرکت نا ذریعہ جوڑ مریک و غلطی تا اصلاح نا کسر ہموار مریک ۔ صدر مملکت پارے کہ حکومت نا وژن 2025ءکنا نظر آن گدرینگانے ہراٹی معیشت نا سوگوی و الس نا شرحالی کن کیہی پرکشش پروگرام اوار کننگانے ہرافتے ٹی قومی پیداوار و فی کس کٹیا نا کچ اٹی ودکی آن پد دنیا نا 25بھلامعیشت آتیٹی اوار مننگ نا عزم ہم اوار ئِ۔ ای خواوہ کہ حکومت، حزب اختلاف و وطن وزیز نا غٹ سیاسی جماعت آک اتفاق رائے اٹ دادے اسہ متفقہ قومی ڈٹ اسے انا حیثیت اس ایتر تانکہ حکومت ہراکہ جماعت نا مرے ، السی شرحالی نا کاریم تیٹی ہچ ئُ اڑاند اس ودی مننگ کپ داڑتون اوار ہی ودوک آ آبادی نا ڈٹ بندی آہم چکار تخنگ نا گرج ئِ تانکہ وسیلہ غاتا درست کاریم اٹ اتنگ ئِ المی جوڑ کننگ مرے۔ صدر مملکت پارے کہ اسٹیٹ بینک و جہانی اقتصادی ادارہ غاتا جاچ آتا رداٹ معیشت نا ٹک آک جان جوڑ ئُ، شرح نمو گدرینگوک آ دہ سال اٹی غٹ آن بڑزکہول آٹی ئِ۔ زرمبادلہ نا کوڑی 23بلین ڈالر نا بڑزانگا کہول ئِ سرمسنے و افراط زر انا شرح ٹی نمان کمتی خننگ انگ ئِ ہرانا بنداو آ معیشت نا غیر جانبداری اٹ جاچ ئِ ہلوک آ جہانی ادارہ موڈیز پارینے کہ مستین اٹی ننا معیشت نا ٹک آک منفی ئسر ولے داسہ سوگوی نا کنڈآ روان ئُ۔ صدر مملکت پارے کہ اوغانستان اٹی امن نا بیدس ڈیہہ ٹی سوگوی ودی مننگ کپک۔ دامسخت کن پاکستان مری مذاکرات ئِ ممکن جوڑ کرے و ہارٹ آف ایشیاپراسس اٹی است انا ھب اٹ بشخ ہلک۔ دہشت گردی نا مون ئِ توننگ کن نن اوغان سروک ئِ سلہ ایتنہ کہ تین پہ تینی کمکاری آن سیمی نظم و نسق گچین جوڑ کننگے۔ صدر مملکت ممنون حسین پارے کہ ننے اندازہ ئِ کہ سالہاسال نا خانہ جنگی و نزوری ناسوب آن ننا دا برادر ملک بے پناہ نسخان ہرفینے۔ مشکل نا داساہت اٹی پاکستان اوغانستان نا ہمیشہ شانہ بشانہ سلوک مسنے۔ تینا اوغان ایلم تے کن گدرینگوک آ منہ سال اٹی بھلو زر اس و مسہ ہزار اوغان طالب علم آتے تعلیمی وظیفہ غاتا فراوانی ہم ہندا چرجوئی نا کڑی اسے۔ توانائی نا گرج آتے پورو کننگ کن تاپی گیس پیپ لین و کاسا 1000 نا ڈٹ آتیان ننے بھاز اومیت آک وابستہ ئپ ۔ نن خوانہ کہ دا ڈٹ آتا بروخت پوروی و ڈیہہ نا غٹ ملک آتون تین پہ تینی کمکاری ٹی ودکی کن تندہی اٹ کاریم کننگے۔ پاکستان روس اتون تینا تعلقداری تے بھاز اہمیت ایتک و خوائک کہ ہڑتوم آ ملک آتا نیام اٹ معیشت، دودوربیدہ و دفاع تون اوار ایلو غٹ بشخ آتیٹی کمکاری ئِ ودفنگے۔ قوم انا ہر بندغ تینا دا معتبر انگا ادارہ ٹی کروک آ فیصلہ غاتیٹی تینے شریک سرپند کیک و اودے تینے آ نافذ کننگ نا آرزومندئِ۔ اگہ نن دا خواہش ئِ حقیقت اٹی بدلیفنگ نا چاگڑد اس ودی کین تو قومی وسیلہ غاک زیات گچین وڑاٹ الس نا شرحالی آ کاریم اٹ اتنگ مریرہ۔ ببو اسہ ایلو نا دوٹی ہلسا دا ادارہ ئِ قومی مسخت آتا پوروی نا ذریعہ جوڑ کین انتئے کہ ننا نصب العین اسہ ہند ن ئُ پارلیمنٹ اسے ہرانا تغ ئِ ننا بزرگ و خاص وڑاٹ مصور پاکستان علامہ اقبال خناسس۔ اللہ تعالیٰ ننے غٹ ئِ تینا حفظ و امان اٹ تخے، آمین، پاکستان پائندہ باد
