پاک چین اقتصادی راہداری نا رداٹ گوادر شار انا شونداری نا ڈٹ آتیا کاریم ترندی اٹ برجائ

خصوصی اقتصادی زون تا اڈتننگ آن پد صنعتی انقلاب نا کسر ہموار مریک
اسلام آباد۔ 01جون (اے پی پی) پاک چین اقتصادی راہداری نا رداٹ گوادر شار انا شونداری و اودے پوسکن ئُ شار اسے ٹی شاغنگ کن چندی ڈٹ آتیا کاریم ترندی اٹ برجائِ ، گوادر شار انا شونداری و داڑے خصوصی اقتصادی زون تا اڈ تننگ آن پد صنعتی انقلاب کن کسر ہموار مریک ۔ دارداٹ بیجنگ اٹی ساڑی آ اڈ ہلوک آ ون بیلٹ ون روڈ فورم نا وخت آ بنجائی وزیر ڈٹ بندی، شونداری و اصلاحات احسن اقبال و وزیراعلیٰ بلوچستان ثناءاللہ زہری نا ساڑی گری ٹی گوادر ڈویلپمنٹ اتھارٹی و چین نا وزارت واپار نا نیام اٹ گوادر ماسٹر سٹی پلان نا معاہدہ و منٹس و گوادر ایسٹ بے ایکسپریس وے نا منٹس آتیا دستخط کننگا۔ بنجائی وزیر احسن اقبال اسہ انٹرویو اسے ٹی پارے کہ گوادر شارئِ سنگار پور وہانگ کانگ نا معیار نا رداٹ جوڑ جاڑ کننگ انگ ئِ ، داڑے مست آن زرکار آتا کنڈآن بے کچ است خواہی نا درشانی ئِ کننگانے ولے زوت دا شار ئِ جہانی بندرگاہ نا حیثیت دوئی مریک، اوپارے کہ گوادر ایسٹ بے ایکسپریس وے ڈٹ ئِ گڈیکو دروشم تننگانے ہرانا رداٹ 18.9کلومیٹر چار لین شاہراہ نا جوڑجاڑ کننگک، دا شاہراہ گوادر بندرگاہ ئِ مکران کوسٹل ہائی وے ، فری زون و آخبت نا کنٹینرز ٹرمینل تون ملفک۔ پاکستان و چین خصوصی اقتصادی زون تے عملی دروشم اس تننگ و پالیسی سازی نا بابت مفاہمتی یات داشت آتیا دستخط ہم کرینے۔ ہڑتوم آ ملک آک اکنامک زون تا بابت پالیسی سازی و اسیجائی ریسرچ آ رضامندی نا درشانی ئِ کرینو و ہڑتوم آ ملک آک اسہ ایلو نا علم و آزموندہ غاتیان فائدہ ہرفسا تین پہ تینی مفید کمکاری نا کمک اٹ سی پیک ئِ سوگو وڑاٹ مون آ دیرہ۔