کشمیر اٹی انسانی حق انا سنگین خلاف ورزی مننگ ئِ ہرانا اقوام عالم و انسانی حق انا تنظیمک بایدے نوٹس ئِ ہلیر، صدر مملکت ممنون حسین
اسلام آباد۔ 31مئی (اے پی پی) صدر مملکت ممنون حسین پارینے کہ کشمیر اٹی انسانی حق انا سنگین خلاف ورزی مننگئِ ہرانا اقوام عالم و انسانی حق انا تنظیمک بایدے نوٹس ئِ ہلیر۔ داہیت ئِ او چارشنبے نا دے بھارت کن پاکستان نا پندار ہائی کمشنر سہیل محمود تون ہیت و گپ کرسا پارے۔ ایوان صدر نا کنڈآن جاری بیان نا رداٹ صدر مملکت پارے کہ کشمیر اٹی بھارتی بیدادی آن سفارتی برادری ئِ گچین وڑاٹ معلومدار کننگے۔ اوپارے کہ دنیا مقبوضہ کشمیر نا حالیت آتیان معلومدار مننگ ئِ ولے دا معاملہ ئِ داسہ پین تالان کننگ نا گرج ئِ۔ صدر مملکت اومیت ظاہر کرے کہ جہانی سیاست اٹی بھاز زوت مثبت بدلی تا گمان ئِ ہراڑآن کشمیر و فلسطین نا ویل ہموجاگہ نا الس نا است خواہی تا رداٹ ایسر مننگ نا اومیت ئِ۔ صدر مملکت پارے کہ پاکستان ڈیہہ ٹی امن کن بھارت تون اوار غٹ ہمسایہ ملک آتون بریبری نا کہول آ دوستانہ تعلقداری تا خواہندار ئِ۔ اوپارے کہ ڈیہہ ٹی امن، سیکورٹی ومعاشی شونداری کن المی ئِ کہ ہڑتوم آ ملک آتا نیام اٹ دوستانہ تعلقداریک ئُ۔ اومستی پارے کہ نن غٹ ویل آتے ہیت وگپ نا کمک اٹ ایسر کننگ خوانہ ہرافتے ٹی کشمیر نا ویل سرفہرست ئِ۔ اوپارے کہ بھارت اقوام متحدہ نا قرارداد آتے گوجالنگ ئِ ہراڑآن ویل آک پیچیدہ مننگ ئُ۔ صدر مملکت پارے کہ بھارتی جاسوس پاکستانی گل زمین آ دہشت گردی ئِ تہو تننگ اٹی اوار ئس ہرامذمت نا قابل ئِ۔ اوپندار ہائی کمشنر ئِ پارت کرے کہ او پاکستان نا موقف و گڑتی تیان جہانی برادری ئِ معلومدار کے۔ صدر مملکت پارت کرے کہ پندار ہائی کمشنر دیر انا ویل آ پاکستان نا موقف ئِ جہانی کہول آ تالان کننگ اٹی تینا کڑد ئِ ادا کے۔
