پاکستان سویل دے ٹکی ایشیائی ڈیہہ تون سیاسی و واپاری تعلقداری تیٹی ودکی نا خواہش مند ئِ
اسلام آباد۔ 30 مئی (اے پی پی) صدر مملکت ممنون حسین پارینے کہ پاکستان تھائی لینڈ تون تعلقداری تے بھاز اہمیت ایتک وپاکستان سویل دے ٹکی ایشیائی ڈیہہ تون سیاسی و واپاری تعلقداری تیٹی ودکی نا خواہش مند ئِ ۔ صدر مملکت سے شنبے نا دے داہیت ئِ پاکستان نا پندار سفیر تھائی لینڈ عاصم افتخار احمد تون ایوان صدر اٹی ہیت وگپ کرسا پارے۔ صدر مملکت پندار سفیر تون پارے کہ پاکستان ئِ آسیان نا پورو رکنیت ترفنگ کن ڈیہہ نا ملک آتون خڑکی رابطہ غاتے استوار کننگے۔ اود ا اومیت نا درشانی ئِ کرے کہ پندار سفیر عاصم افتخار ہڑتوم آ ملک آتا ہڑتوم آ کنڈآتا تعلقداری تا مون آ دننگ اٹی تینا پبی کڑد ئِ ادا کیک۔ صدر مملکت پارے کہ واپار، دفاع و تعلیم نا بشخ اٹی تعلقداری تیٹی پین ودکی نا گرج ئِ۔ اوپارے کہ آزادانہ واپار نا مون آ دننگ کن کروک آ قول و اقرار اٹی ترندی اٹ پیش رفت نا گرج ئِ تانکہ 2017ءنا ایسر اسکان دادے عملی جامہ اس بیرفنگ مرے۔ صدر مملکت پندار سفیر ئِ پارت کرے کہ او تھائی لینڈ اٹی ساڑی پاکستانی کمیونٹی تون خڑکی رابطہ تخے و اوفتے ہر وڑنا آسراتی فراوان کننگے۔
