توانائی ئِ کابینہ کمیٹی ئِ اجلاس
اسلام آباد۔29مئی ( اے پی پی) مزن وزیر محمد نواز شریف ئَ رمضان شریف ئَ بجلی ئِ لوڈشیڈنگ ئَ را کم چہ کم کنگئِ پرمان داتگ اَنت۔ دوشمبے ئِ روچئَ توانائی ئِ کابینہ ئِ اجلاسئِ سروکی کتگءُ مزن وزیر محمد نواز شریف ئَ لوڈشیڈنگ ئِ استیں شیڈولئِ سرئَ برانز گپتگ۔ آئی ئَ زورپِرداتگ کہ دراھیں لائن ڈیپارٹمنٹ گرماگ ئَ اُلسئَ را گیشاں چہ گیش کمک پھجارینگئِ مول ءُ مراد ئَ را دیمئَ ایر بہ کن اَنت ءُ فعال ءُ گیشءُ گیواری ئِ ھیال ءُ لیکہ ئَ بہ دار اَنت۔ مزن وزیر ئَ گشتگ کہ حکومت لینئِ کمیئِ سوبئَ اُلسئِ جیڑھءُ جنجالاں چہ سرپد اِنت ءُ تاں ھما وھدئَ تاہیرئِ سرئَ نہ نیندایت وھدے کہ اُلسئَ را کمک نہ رسیت۔ جاورھالانی ناگیگی ءِ سوبئَ مزن وزیر ئَ توانائی کمیٹی ئِ کابینہ ئِ اجلاس سئے شمبے ءِ روچئَ پدا توار کتگ۔ کمیٹی ئَ را ھال دیئگ بوتگ کہ مارچ2018ئَ 9ہزار107میگاواٹ ئِ گیشیں بجلی ٹرانسمیشن سسٹم ئِ تہا دست کپیت۔ آپءُ لین ئِ سیکرٹری ئَ کمیٹی ئَ را شونشت داتگءُ کابینہ ئِ توانائی کمیٹی ئِ گوستگیں اجلاس ئِ پیسلہ آنی سرئَ پیشرفت، انوگیں منیجمنٹ پلان، سرکلرڈیٹ، آیوکیں توانائی ئِ منصوبہ آں چہ لینئِ بھرءُ بانگ ءُ ٹرانسمیشن ءُ پاورپلانٹس ئِ کارمرزی ئِ ھوالگئَ انوگیں جاورھالاں چہ سرپد کتگ۔ کمیٹی ئَ را ھال دیئگ بوتگ کہ بھکی ءُ حویلی بہادر شاہ پلانٹس ئِ لھتیں ٹربائن ئَ را کسانیں تکنیکی جیڑھ اَست کہ مینوفیکچرئِ نیمگئَ چہ شر کنگ بوھگئَ اِنت۔ مزن وزیر ئَ پرمان داتگ کہ شرکنگئِ کار زوتاں چہ زوت سرجم کنگ بہ بیت۔ اجلاسئَ را ھال دیئگ بوتگ کہ بجلی ئِ پیداوارءُ بھرءُ بانگ ئِ نظام ئِ مانیٹرنگ ئِ کار ھم کنگ بوھگئَ اِنت وھدے کہ 270منصوبہ آنی ھم مانیٹرنگ کنگ بوھگئَ اِنت۔ چیف ایگزیکٹو افسرءُ ڈسکوز ئِ گوما آپریشنل جیڑھ آنی گیشءُ گیواری ئِ ھاترئَ باقاعدہ اجلاس بوھگئَ اَنت۔ پٹرولیمءُ قدرتی وسائل ئِ وزیر شاہد خاقان عباسی ئَ کمیٹیئَ را ھال داتگ کہ کراچی ئَ چہ لاہور ایل این جی نوکیں گیس ٹرانسمیشن پائپ لائن چیر گیجگ بوھگئَ اِنت۔ کمیٹی ئَ گیس پائپ لائن ئِ کارءِ سرئَ سدّکی ئِ درشانی کتگ۔ اجلاس ئِ تہا ھزانگئِ وزیر اسحاق ڈار، آپءُ لینئِ بنجاھی وزری خواجہ محمد آصف ، پٹرولیم ءُ قدرتی وسائل ئِ وزیر شاہد خاقان عباسی، پنجابئِ سروزیر محمد شہباز شریفءُ دگہ حکام ھوار بوتگ اَنت۔
