کابینہ کمیٹی توانائی نا دیوان
اسلام آباد۔ 29مئی (اے پی پی) وزیراعظم محمد نواز شریف روچہ مبارک اٹی بجلی نا لوڈشیڈنگ ئِ کم آن کم کننگ نا حکم تسنے۔ دوشنبے نا دے کابینہ کمیٹی توانائی نا دیوان نا کماشی ئِ کرسا وزیراعظم محمد نواز شریف لوڈشیڈنگ نا ساڑی آ شیڈول آ ناراضگی نا درشانی ئِ کرے۔ اوزور شاغاکہ غٹ لین ڈیپارٹمنٹ تیرمہ ٹی الس ئِ زیات آن زیات ریلیف فراوان کننگ نا مسخت ئِ مون آ تخسا فعال و ایسر آ مبنی سوچ اس تینا کیر ۔ وزیراعظم پارے کہ حکومت نا بجلی نا کاختی نا سوب آن الس ئِ مون تروک ویل آتیان اودے جوانی اٹ سمائِ و اوہمو وخت اسکان آرام اٹ تولپک ہراوخت اسکان الس ئِ ریلیف ملیپک۔ حالیت آتا سنگینی ئِ مون آ تخسا وزیراعظم کابینہ نا توانائی کمیٹی نا دیوان ئِ (اینو) سے شنبے نا دے دُوارہ بٹنگا۔ کمیٹی ئِ پاننگاکہ مارچ 2018ءٹی 9 ہزار 107 میگاواٹ نا ودکی بجلی ٹرانسمیشن سسٹم اٹی دستیاب مریک۔ سیکرٹری دیر و بجلی کمیٹی ئِ بریفنگ ترسا کابینہ نا توانائی کمیٹی نا گدرینگوک آ سال انا فیصلہ غاتیا پیش رفت ، ساڑی آ لوڈمینجمنٹ پلان سرکلر ڈیٹ، بروک آ توانائی نا ڈٹ آتیان بجلی نا بشخ و پانٹ و ٹرانسمیشن وپاور پلانٹس آتا کاریم اٹ اتنگ نا بابت تازہ انگا حالیت آتیان معلومدار کرے۔ کمیٹی ئِ پاننگاکہ بھکی و حویلی بہادر شاہ پلانٹ نا گڑاس ٹربائن تے معمول نا تکنیکی ویل آتا مون تروکی ئِ ہرا مینو فیکچرنا کنڈآن ایسر کننگ انگ ئِ۔ وزیراعظم پارت کرے کہ جوڑ جاڑ نا کاریم ئِ زوت پورو کننگے، دیوان ئِ پاننگاکہ وزارت پٹرولیم و قدرتی وسیلہ نا خصوصی کمیٹی روایتی ایندھن آن ایل این جی آ منتقلی کن متوازن متبادل ڈٹ اسے آ کاریم کننگ ئِ۔ کمیٹی ئِ پاننگاکہ بجلی نا پیداوار و تقسیم نا نظام نا مانیٹرنگ نا کاریم باقاعدگی اتون کننگ انگ ئِ وخت اس کہ 270 ڈٹ آتا ہم مانیٹرنگ کننگ انگ ئِ۔ چیف ایگزیکٹو افسر و ڈسکوزآتون آپریشنل ویل آتا ایسری کن باقاعدہ دیوان مننگ ئِ۔ وزیر پٹرولیم و قدرتی وسیلہ شاہد خاقان عباسی کمیٹی ئِ معلومدار کرے کہ کراچی آن لاہور ایل این جی پوسکن آ گیس ٹرانسمیشن پیپ لین شاغنگ انگ ئِ۔ کمیٹی گیس پیپ لین آ کاریم آ است جمی نا درشانی ئِ کرے۔ دیوان اٹی وزیر خزانہ اسحاق ڈار ، وزیر دیر و بجلی خواجہ محمد آصف ، وزیر پٹرولیم و قدرتی وسیلہ شاہد خاقان عباسی ، وزیراعلیٰ پنجاب محمد شہباز شریف و ایلو کمامدارآک ساڑی ئسر۔
