فاٹا، آزاد جموں و کشمیر و گلگت بلتستان نا شونداری پروگرام تے کن فنڈ انا فراوانی اوفتاحق ئِ
اسلام آباد۔ 29 مئی (اے پی پی) بنجائی وزیر خزانہ اسحاق ڈار پارینے کہ فاٹا، آزاد کشمیر و گلگت بلتستان نا شونداری کن صوبہ غاتے قابل تقسیم محاصل نا بشخ آن بایدے پیسہ تننگے، سیکورٹی معاملہ غاتیا سالانہ 90 آن 100 ارب روپئی خڑچ مننگ ئِ، خراج وصولی ٹی ودکی مننگ ئِ تو ولدا دا علاقہ غاتے کن فنڈز تننگ اٹی ہم ہچ ئُ حرج اس اف۔ دوشنبے نا دے ایوان بالا ٹی سینیٹر الیاس بلور نا اعتراضی ٹک انا ورندی ٹی اوپارے کہ مشترکہ مفادات کونسل نا دیوان اٹی ہم آزاد کشمیر نا وزیراعظم، گلگت بلتستان نا وزیراعلیٰ و خیبر پختونخوا نا گورنر دامعاملہ ئِ چست کریسس۔ سیکورٹی معاملہ غاتیا 90 آن 100 ارب روپئی خڑچ مننگ ئِ۔ دا سال ہم 90 ارب روپئی دامسخت کن جتا کننگانے۔ دا پیسہ غاتیان آئی ڈی پی تا بحالی و پوسکن جوڑ جاڑ نا کاریم ہم مریک۔ داکان بیدس 57سول آرمڈ فورس آتا ہم تشکیل تننگانے۔ ایئر فورس، پاک فوج و سول آرمڈ فورس آتا گرج آتے پورو کننگ کن قابل تقسیم محاصل آن بنجاءو صوبہ تینا بشخ آن پین پیسہ تننگ کیرہ۔ انتئے کہ سیکورٹی آپریشن آ ودکی خڑچہ مننگ ئِ۔ فاٹا، آزاد جموں و کشمیر و گلگت بلتستان نا شونداری پروگرام آتے کن فنڈ ز انا فراوانی اوفتا حق ئِ۔ اوپارے کہ بجٹ آن پد ہرچار آ صوبہ غاتا وزیراعلیٰ تے بٹنگسا دا بابت فیصلہ کننگک۔ پارلیمنٹ نا ہڑتوم آ ایوان تے ہم دا چرجوئی ٹی تینا کڑد ئِ اداکروئی مرے و صوبہ غاتیا زور شاغنگے کہ فاٹا، آزاد کشمیر و گلگت بلتستان کن فنڈ تننگے۔
