اسلام آباد۔ 28 مئی (اے پی پی) پاکستان مسلم لیگ (ن) نا چیئرمین و سینیٹ اٹی قائد ایوان راجہ ظفرالحق پارینے کہ 1998 ءٹی وزیراعظم محمد نواز شریف نا سروکی ٹی جوہری دھماکہ غاتا مشکل فیصلہ پاکستان نا بیوسی ئس ، کم آن کم دفاعی لائخی ئِ برقرار تخنگ آن بیدس ہچ ئُ چارہ اس ہلوکہ، دھماکہ غاتیان پاکستان نا دفاع ئِ ناقابل تسخیر جوڑ کننگ اٹی کمک رسینگانے۔ ایٹمی واک مننگ نا باوجود پاکستان ڈیہہ ٹی امن خوائک۔ یک شنبے نا دے داڑے پاکستان نا ایٹمی واک جوڑ مننگ نا 19سال پورو مننگ نا وخت آ تینا اسہ انٹرویو اسے ٹی راجہ ظفرالحق پارے کہ 1998ءٹی وزیراعظم محمد نواز شریف نا سروکی ٹی جوہری دھماکہ غاتا مشکلئُ فیصلہ اس کننگاسس و داوڑ کننگ پاکستان نا بیوسی ئس۔ اوپارے کہ پاکستان نا دارداٹ ہچ ئُ ارادہ اس ہلوکہ انتئے کہ جوہری جلہو آتیٹی تباہی اسہ وڑ مریک ولے ہراتم بھارت 13مئی آ ایٹمی دھماکہ کرے تو نن تون کم آن کم دفاعی لائخی ئِ برقرار تخنگ آن بیدس ہچ ئُ کسر اس ہلوکہ۔ راجہ ظفرالحق پارے کہ جوہری سلہہ غاتا اسہ دلچسپ پلو دادے کہ داٹی کڑدہ غاتون سلہہ غاتا کچ ئِ ہِننگپک ، اگہ اسہ ملک اسے تون 10 جوہری سلہ مرے تو ایلوڑتون ہزار تو ہڑتوم آک اسہ وڑتکنگرہ انتئے کہ داڑآن اسہ وڑ تباہی بریک۔
