بروک آ مالی سال انا بجٹ اٹی خراج وصولی تا ہدف ئِ 3500 ارب روپئی آن ودفسا 4013ارب روپئی کننگا، لس بندغ آ ہچ ئُ پوسکن ئُ خراج اس خلنگ تنے، بجٹ اٹی 120 ارب روپئی نا خراج خلنگانے وخت اس کہ چندی خراج و ڈیوٹی تا مد اٹی 33ارب روپئی نا ریلیف فراوان کننگانے، کشت و کشار کن گدرینگوک آ سال انا غٹ رعایتی پیکج آتے بحال تخانن، ڈی اے پی کھد آ سیلز خراج اٹی 300 روپئی نا کمتی کننگانے، ٹوب ویل آتے کن بجلی نا ریٹ 5.35روپئی اسہ یونٹ کننگانے، آب پاشی کن 3آن 36ہارس پاور پٹیرانجن تیا خراج ختم و پولٹری نا بشخ انا خراج آتا کچ ئِ 17 درسد آن 7 درسد اسکان کم کننگانے، سرکاری ملازم آتا پنداوڑی تیٹی 50 درسد نا ایڈہاک ودکی ئِ بنداوی پنداوڑی ٹی ضم کننگ آن پد بنداوی تنخواہ آ 10 درسد ایڈہاک ریلیف تننگک، ہاﺅس بلڈنگ نا جنوزان نیاڑی تا پنچ لکھ روپئی اسکان نا کڑز آتے معاف کننگک، بجلی نا اُرائی صارف ، ٹوب ویل و بلوچستان نا بابت سبسڈی و آسراتی تے برقرار تخنگک
اسلام آباد۔ 27مئی (اے پی پی) بنجائی وزیر خزانہ اسحاق ڈار پارینے کہ بروک آ مالی سال انا بجٹ اٹی خراج وصولی تا ہدف ئِ 3500 ارب روپئی آن ودفسا 4013ارب روپئی کننگانے و داٹی لس بندغ آ ہچ ئُ پوسکن ئُ خراج اس خلنگ تنے، بجٹ اٹی 120 ارب روپئی خراج خلنگانے وخت اس کہ چندی خراج و ڈیوٹی تا مد اٹی 33ارب روپئی نا ریلیف فراوان کننگانے، کشت وکشار کن گدرینگوک آ سال انا غٹ رعایتی پیکج آتے بحال تخانن، ڈی اے پی کھد آ سیلز خراج اٹی 300 روپئی نا کمتی کننگانے، ٹوب ویل آتے کن بجلی نا ریٹ ئِ 5.35روپئی اسہ یونٹ تخنگانے، آب پاشی کن 3آن 36ہارس پاور پیٹر انجن تیا خراج ختم و پولٹری نا بشخ انا خراج آتا کچ ئِ 17 درسد آن 7 درسد اسکان کم کننگانے، ہچ ئُ دُن ئُ خراج اس خلنگ تنے ہراڑآن پال انا نرخ اٹی ودکی مرے، 15جولائی اسکان 10لکھ آن کم انا سیلزخراج ری فنڈ کلیم کلیئر کننگک وخت اس کہ داکان زیات انا کلیم 14اگست اسکان کلیئر کننگرہ و دانظام ئِ آن لائن تخنگک، پاکستان بھاز زوت جی 20 ملک آتا صف اٹی اوار مریک، حکومت اسہ ارب ڈالر مالیت نا بانڈ جاری کیک و سمندر پار رہینگوک پاکستانی تتون اوار ایلو درملکی داٹی زرکاری کننگ کیرہ۔ سمندرپار رہینگوک پاکستانی تے کن اسلام آباد ئِ اسہ ہنکینی ئُ سیکٹرا س جوڑ کننگک، داڑکن وصولی درملکی کرنسی ٹی بنکنگ چینل آن مریک۔ زرکاری نا مون آ دننگ کن پاکستان انفراسٹرکچر ڈویلپمنٹ بینک اس اڈ تننگک ہرابیرہ نجی بشخ اٹی زرکاری کیک، چنکو کڑز دوئی کروک آتا آسراتی کن پاکستان پاورٹی فنڈاتون اوار ایلو ادارہ غاتا ادغام آن پاکستان میکرو فنانس کمپنی اس جوڑ کننگانے، سرکاری ملازم آتا پنداوڑی تیٹی 50 درسد نا ایڈہاک ودکی ئِ بنداوی پنداوڑی ٹی ضم کننگ آن پد پنداوڑی آ 10 درسد ایڈ ہاک ریلیف تننگک، ہاﺅس بلڈنگ نا جنوزان نیاڑی تا پنچ لکھ روپئی اسکان نا کڑز آتے معاف کننگک، بجلی نا اُرائی صارف آتے کن 300 یونٹ بجلی صرف کننگ، ٹوب ویل و بلوچستان نا بابت سبسڈی و آسراتی تے برقرار تخنگک، سیلز خراج نا کچ اٹی ودکی آن سیمنٹ نا اسہ گونی نرخ بیرہ 12روپئی اسکان ودک، 2018ءگچین کاری تا سال ئِ ہنداخاطران اومیت کننگاکہ کہ بروک آ مالی سال انا بجٹ اٹی آسراتی تننگک و حکومت پورو کوشست کرینے کہ میکرو اکنامک سوگوی نا فائدہ غاتے رکھ جوڑ کرسا زیات آن زیات فائدہ ہرفنگے۔ ہفتہ نا دے داڑے بجٹ آن پد پریس کانفرنس آن تران کرسا بنجائی وزیر خزانہ سینیٹر محمد اسحاق ڈار پارے کہ ننے ملک انا معاشی سوگوی کن اواری اٹ سخت خواری کروئی مریک۔ اوپارے کہ ننا غٹ انا فرض ئِ کہ نن چارٹر آف اکانومی آ امنا کین تانکہ معاشی ہد ف آتے دوئی کننگ مرے۔ اوپارے کہ ای تینا بجٹ تقریر اٹی ہم مسہ سال آن بیدس پنچ سال انا میکرو اکنامک ہدف آتا ذکر ئِ کریسٹ تانکہ سال 2018-23ءنا دورِ حکومت اٹی ، ہراسٹ ئِ کہ حکومت نا موقع ملے ، او معاشی ہدف آتا دوئی ئِ المی جوڑ کننگ کے۔ اوپارے کہ گچین کاری تیان مست دا آخریکو سال ئِ ہراٹی نن بایدے چارٹر آف اکانومی آ متفق مرین تانکہ اقتصادی و راجی ہدف آتا درست تعین ئِ کننگ مرے۔ اوپارے کہ ننے ویل آتے مون آتخسا شونداری ہدف آتا دوئی ئِ المی جوڑ کننگ نا کوشست کروئی مریک۔ اوپارے کہ ملک انا جم اٹنگا بجٹ اٹی بروک آ مالی سال 2017-18ءکن 11.7درسد نا ودکی کننگانے و قومی بجٹ نا کچ ئِ 4256ارب روپئی آن ودفسا 4753ارب روپئی کننگانے۔ بروک آ مالی سال انا بجٹ نا اہم ٹک آتا ذکر ئِ کرسا وزیر خزانہ پارے کہ حکومت دفاع تون اوار قومی معیشت نا ایلو بشخ آتیا خصوصی چکار تخانے۔ اوپارے کہ پائیدار اقتصادی شونداری کن بنجائی حکومت نا سرکاری بشخ انا شونداری پروگرام نا بجٹ 715ارب روپئی آن ودفسا 10کھرب اسہ ارب روپئی کننگانے وخت اس کہ صوبہ غاتا شونداری بجٹ نا تخمینہ 11کھرب 12ارب روپئی ئِ۔ ہنداوڑ بروک آ مالی سال اٹی جم اٹنگا شونداری بجٹ نا کچ 2100 ارب روپئی آن زیات تخنگانے ہرا ملک انا گرج ئِ۔ وزیر خزانہ پارے کہ مسلم لیگ (ن) نا حکومت تینا دورِ اقتدار نا اولیکوسال اٹی ہی معاشی ہدف آتا تعین ئِ کرے تانکہ اول اقتصادی سوگوی دوئی کرسا شرح نمو آ چکار تخنگ مرے۔ اوپارے کہ حکومت اقتصادی شرح نمو ٹی ودکی کن گدرینگوک آ سال چندی گام گیج آتے کریسس ہرافتیان خاطر خواہ نتیجہ دوئی مسنے۔ اوپارے کہ اینخو مالی سال اٹی کشاری بشخ انا شرح شونداری 3.46درسد سلیس ہراٹی پین ودکی کن کشاری کڑز آتا فراوانی ٹی ودکی کننگک۔ اوپارے کہ حکومت تینا اولیکو سال اٹی کشاری بشخ اکن 300 ارب روپئی آن زیات نا کڑز آتا ہدف ئِ مقرر کریسس ہرا جاری مالی سال اکن 700 ارب روپئی ئُ و اومیت ئِ کہ مالی سال انا ایسری اسکان کڑز آتا فراوانی نا ہدف ئِ دوئی کننگک۔ کشاری بشخ انا شونداری کن حکومت بروک آ مالی سال اکن کڑز آتا اجراءنا ہدف ئِ 1001ارب روپئی مقرر کرینے۔ وزیر خزانہ پارے کہ ننا حکومت بروک آ مالی سال انا بابت چندی معاشی ہدف آتے مقرر کرینے ہرافتا رداٹ جم اٹنگا قومی پیداوار (جی ڈی پی) نا شرح نمو 6درسد آن زیات دوئی کننگ کن گام گیج کننگک۔ اوپارے کہ اومیت ئِ کہ بروک آ مالی سال انا معاشی ہدف آتے دوئی کننگک وخت اس کہ انویسٹمنٹ ٹوجی ڈی پی نا ہدف 17 درسد وافراط زر انا ہدف 6درسد نا کہول آن کم تخنگک۔ اوپارے کہ حکومت ملک انا معاشی شونداری کن میکرو اکنامک سٹریٹجی نا رداٹ بجٹ تیار کرینے۔ اوپارے کہ بروک آ مالی سال اٹی اولیکو وار شونداری بجٹ اٹی نمان ودکی کننگانے و حکومت بیرہ شونداری ڈٹ آتا پوروی کن کڑز ہلکونے۔ وزیر خزانہ پارے کہ دنیا نا بھلا بھلا معیشت آتیٹی ہم غیر شونداری خڑچ آتے کن کڑز دوئی کننگک ولے مسلم لیگ (ن) نا حکومت بیرہ شونداری خڑچ آتے کن کڑز ہلکونے۔ اوپارے کہ قومی معیشت آ دباﺅ نا باوجود اینخو مالی سال اٹی مشینری نا درآمد آتیٹی نمان ودکی مس ہراڑآن غٹ بشخ آتا شونداری ٹیی کمک رسینگک و معاشی شرح نمو ٹی ودکی مریک۔ وزیر خزانہ پارے کہ ڈیٹ ٹو جی ڈی پی ئِ پین کم کرسا 60 درسد آن کم تخنگک۔ ملک اٹی بجلی ناحالیت آتا بابت اوپارے کہ 2018ءاسکان قومی گریڈ اٹی 10 ہزار میگاواٹ بجلی نا اوار مننگ نا ہدف ئِ ہرادے دوئی کننگک و ملک آن لوڈشیڈنگ نا لعنت نا ہمیشہ ہمیشہ کن چٹک۔ اسحق ڈار مستی پارے کہ راجی رکھ انا پروگرام کن بجٹ ئِ ہم 121ارب روپئی اسکان ودفنگانے وخت اس کہ ایف بی آر نا خراج وصولی تا ہدف اٹی 14درسد نا ودکی کننگانے۔ ہنداوڑ بنجائی شونداری خڑچ آتیٹی 11درسد ودکی کننگانے۔ بروک آ مالی سال 2017-18ءنا بجٹ آ میڈیا ئِ بریفنگ ترسا وزیر خزانہ اسحاق ڈار پارے کہ بروک آ مالی سال اٹی غیر شونداری خڑچ آتا شرح ئِ افراط زر آن کم تخنگک وخت اس کہ مستین اٹی ہمیشہ دانا الٹ مسنے۔ اوپارے کہ حکومت مالیاتی نسخان نا مون ئِ توننگ اٹی جامع گام گیج کیک۔ معیشت نا چندی بشخ بشمول کشت وکشار، مالیات، برآمدات ، راجی رکھ اتون اوار ایلو بشخ آتا شونداری کن خصوصی گام گیج کننگانے وخت اس کہ آئی ٹی نا بشخ انا برآمد آتیٹی ودکی کن ہم ہدف مقرر کننگانے۔ اوپارے کہ داوخت ملک اٹی آئی ٹی نا بشخ اٹی 2لکھ ورنافری لانسر نا وڑاٹ کاریم کننگ ئُ وخت اس کہ حکومت پین بندغ آتے تربیت ترسا اوفتا کچ ئِ 10 لکھ اسکان ودفک دا بابت وزارت آئی ٹی ئِ ٹاسک تننگانے۔ اوپارے کہ انفارمیشن ٹیکنالوجی ہی ننا آخبت ئِ ہرانا شونداری آن روزگار نا وارخواہی ودرہ و ملک اٹی تینٹ روزگاری نا کلچر ئِ فروغ ملک و داڑکن حکومت بجٹ اٹی اسہ جامع پیکج اس تخانے، داڑآن بیدس ملک اٹی ہندی وغیر ہندی زرکاری نا مون آ دننگ کن ہم خاطرخواہ گام گیج کننگانے و دابابت چندی خصوصی اسکیم تے درستی راستی کرفنگانے ۔ اوپارے کہ کشاری بشخ قومی معیشت اٹی بنداوی اہمیت تخک ہرانا پیش نظر 12.5ایکڑ اسکان نا 20لکھ کشارگرآتے 50 ہزار روپئی اسکان نا آسان کڑز کم شرح سود آ تننگک و دافتیا شرح سود ئِ 17 درسد آن 9.9 درسد اسکان کم کننگک۔ اوپارے کہ حکومت کشت وکشار کن گدرینگوک آ سال انا غٹ رعایتی پیکج آتے بحال تخانے۔ دابابت غٹ شریدار آتون سرجم صلابت کننگانے۔ اوپارے کہ ڈی اے پی کھد آ سیلز خراج اٹی 30 روپئی نا کمتی کننگانے ۔ ہراڑآن خراج وصولی تیٹی 13.8 ارب روپئی نا کمتی واقع مریک، وخت اس کہ ٹوب ویل آتے کن بجلی نا ریٹ 5.35روپئی فی یونٹ تخنگانے ہراڑآ 27 ارب روپئی نا خڑچ آک مریرہ۔ داکان بیدس آب پاشی کن 3ہارس پاور آن ہلیس 36ہارس پاور پیٹر انجن تیا خراج ئِ چٹفنگانے و پولٹری نا بشخ انا خراج آتا شرح ئِ 17 درسد آن 7 درسد اسکان کم کننگانے۔ دا گام گیج آتا کشت وکشار آ مثبت زئم تمک۔ خذمت آتا بشخ انا بابت وزیر خزانہ پارے کہ آئی ٹی ئِ خصوصی آسراتی تننگانے ہرانا رداٹ آئی ٹی پارک انا اڈتننگ ئِ عمل اٹی اتنگک ، موبائل کارڈز آ خراج نا کچ اٹی 1.5درسد کمتی کننگانے۔ ہنداوڑ ہاﺅسنگ نا بشخ اکن ہم گام گیج کننگانے ہراڑآن دا بشخ اتون گنڈوک 27ذیلی صنعت آتے فائدہ دوئی مریک۔ اوپارے کہ اینخو مالی سال اکن خراج وصولی تا ہدف 3500 ارب روپئی ئِ ہرادے بروک آ مالی سال نا بجٹ اٹی 120 ارب روپئی خراج خلنگانے وخت اس کہ چندی خراج و ڈیوٹی تا مد اٹی 33ارب روپئی ناریلیف فراوان کننگانے اوکان پد بروک آ مالی سال اکن جم وڑاٹ پوسکن آ خراج بیرہ 87 ارب روپئی جوڑ مریک ہرا بے کچ معمولی ئُ ودکی اسے۔ اوپارے کہ لس بندغ آ خراج نا بھاریم ئِ شاغنگ آن بیدس نان فائلرز آتیا بھاریم ئِ گدریفنگا وخت اس کہ ہچ ئُ بھلو خراج اس خلنگ تنے۔ پال انا نرخ آتیٹی ودکی نا بابت اوپارے کہ ہچ ئُ دُن ئُ خراج اس خلنگ تنے ہراڑآن پال انا نرخ اٹی ودکی مرے و دابابت وزارت نیشنل فوڈ سیکورٹی و صوبائی حکومت آتا گام گیج کننگ نا پارت کننگک انتئے کہ ڈیوٹی یاخراج آتیٹی بدلی مفننگ نا سوب نرخ آتے ودفنگ مفک۔ اوپارے کہ نرخ آتے کنٹرول کننگ کن میڈیا ہم تینا کڑد ئِ ادا کے و صارف آتے حالیت آتیان معلومدار تخے تانکہ ہچ گہس تینٹ نرخ آتے ودفنگ کپ۔ اومعیشت نا چندی بشخ آتیٹی برآمد آتا ودکی و خراج اسٹائل نا بشخ اکن 180 ارب روپئی نا پیکج نا بارواٹی پارے کہ دابرجاسلک۔ اوپارے کہ سیل خراج نا ری فنڈ کلیمز نا ادائیگیک ہم طے شدہ نظام الاوقات نا رداٹ کننگک و 15جولائی اسکان 10لکھ آن کم انا کلیم کلیئر کننگک وخت اس کہ داکان زیات انا کلیمز اگست اسکان کلیئر کننگک و دانظام آن لائن تخنگک تانکہ چیک انا وصولی نا بابت آسودہی فراوان کننگ مرے۔ کلیمز نا ادائیگی بینک ٹو بینک ٹرانزیکشنز نا کمک اٹ کننگک۔ برآمد آتیٹی ودکی کن چندی پین گام گیج ہم کننگک۔ اومستی پارے کہ شرح نمو ٹی ودکی نا ہدف نا دوئی کن پی ایس ڈی پی و صوبائی شونداری بجٹ آتیان بید س پین گام گیج ہم کننگک تانکہ شرح نمو ئِ 6 درسد آن ودفنگ مرے۔ دابابت پاکستان ڈویلپمنٹ فنڈ انا اڈتننگ تون اوار چندی گام گیج کننگک تانکہ پیشن نا ملک رہینگوک پاکستانی تے زرکاری نا وارخواہی فراوان کننگ مرے۔ اوپارے کہ حکومت اسہ ارب ڈالر مالیت نا بانڈز جاری کیک ہرانا ضمانت حکومت ایتک و سمندر پاررہینگوک پاکستانی تتون اوار ایلو درملکی داٹی زرکاری کننگ کیرہ۔ اوپارے کہ سمندر پار رہینگوک آ پاکستانی تا خواست آ اوفتے کن اسلام آباد اسہ ہنکینی سیکٹر اس جوڑ کننگک ۔ دابابت سی ڈی اے ئِ پارت تننگانے ہراڑآ زوت کاریم نا بنائِ کننگک داڑکن وصولی غیر ملکی کرنسی ٹی بنکینگ چینل آن مریک زرمبادلہ نا کوڑی ٹی ودکی مریک دا پیسہ غاک سی ڈی اے ئِ پاکستان کرنسی ٹی ملرہ ولے سٹیٹ بینک انا زرمبادلہ نا کوڑی ودک۔ اوپارے کہ نجی بشخ و بنداوی ڈھانچہ نا بشخ اٹی زرکاری نا مون آ دننگ کن آئی ایف سی تون مذاکرات کننگانے و دابابت پاکستان انفراسٹرکچر ڈویلپمنٹ بینک اس اڈتننگک ہرا بیرہ نجی بشخ اٹی زرکاری کیک۔ وزیر خزانہ پارے کہ اومیت ئِ کہ بروک آ حکومت ہم اقتصادی شرح نمو ٹی ودکی آ چکار تخک۔ اواومیت ظاہر کرے کہ پاکستان بھاز زوت جی 20 ملک آتا صف اٹی اوار مریک۔ میکرواکنامک سوگوی نا بابت چنکو کڑز ہلوک آتا آسراتی کن پاکستان پاورٹی فنڈ اتون اوار ایلو ادارہ غاتا ادغام آن پاکستان میکروفنانس کمپنی اس جوڑ کننگانے ہرادے صارف آتا کچ 4ملین آن ودفسا 10ملین کننگ نا ہدف تننگانے تانکہ زیات آن زیات خلقت داڑآن فائدہ ہرفنگ کیر۔ چنکا و درمیانہ درجہ نا کاروباری ادارہ غاتا بشخ اکن ہم چندی آسراتی فراوان کننگ انگ ئِ۔ اوپارے کہ جاپان و جرمنی تون اوار کیہی ایلو سوگو معیشت آتیانبار ایس ایم ایس نا بشخ ئِ حقی وڑاٹ قومی معیشت نا مخ انا ملی جوڑ کننگک ہراڑآن معیشت اٹی نمان شونداری مریک۔ سرکاری ملازم آتا بابت وزیر خزانہ پارے کہ ملازم آتا متکن آ ڈیمانڈ اس کہ اوفتا ایڈ ہاک ریلیف آتے پنداوڑی ٹی ضم کننگے ہرانا پیش نظر حکومت 50 درسد نا ودکی ئِ بنداوی پنداوڑی ٹی اوار کننگ نا فیصلہ کرینے، و داودکی آن پد بنداوی پنداوڑی آ 10 درسد ایڈہاک ریلیف تننگک۔ اوپارے کہ داکان بیدس سرکاری ملازم آتے کن ایلو کیہی آسراتی ہم بروک آ بجٹ اٹی اوار کننگانے۔ وزیر خزانہ پارے کہ گدرینگوک آ بجٹ اٹی پنداوڑی و الاﺅنسز اٹی ودکی آن 60 ارب روپئی نا خڑچ مسوسس وخت اس کہ داسال دارداٹ 125ارب روپئی نا خڑچ آک مریرہ، دافتے کن جتا آن بجٹ اسے نا گرج مفک انتئے کہ دا بابت چندی ڈویژن و محکمہ گاتے کن مست آن ہی بجٹ جتا کننگانے۔ اوپارے کہ تدوک آدے چار وزارت آتیٹی ہِننگ آن پد سرکاری ملازم آتا ردعمل ئِ ہلنگ نا موقع ملا تو او بھاز خوش ئسر ، داکان بیدس شہداءاوفتا خاہوت و دہشت گردی نا جنگ اٹی معذور مروک آتےکن ہم خصوصی آسراتی نا فیصلہ کننگانے وخت اس کہ راجی رکھ انا پروگرام نا چرجوئی ٹی پاکستان بیت المال نا بجٹ اٹی 50 درسد نا ودکی آن دادے 4ارب آن 6ارب روپئی اسکان ودفنگانے۔ اوپارے کہ مسلم لیگ (ن) نا حکومت تینا گدرینگوک آ دور حکومت اٹی ہاﺅس بلڈنگ نا جنوزان نیاڑی تا مسہ نیم لکھ روپئی اسکان نا کڑز معاف کریسس وخت اس کہ داسہ پنچ لکھ روپئی اسکان نا کڑز معاف کننگک ہرا فتے وزارت خزانہ ایتک۔ داخڑچ آتا تخمینہ 2.5ارب آن 3ارب روپئی جوڑمریک، اوپارے کہ بجلی نا اُرائی صارف آتے کن 300 یونٹ بجلی صرف کننگ، ٹوب ویل و بلوچستان نا بابت سبسڈی و آسودہی ئِ برقرار تخنگک ہراڑآ 121ارب روپئی نا خڑچ آتے سگک۔ اوپارے کہ معیشت نا چندی بشخ آتیٹی اصلاحات و خراج و ڈیوٹی تا کچ اٹی ردوبدل اوفتا صلابت آن کننگانے۔ اسحاق ڈار پارے کہ سیمنٹ آ 25درسد نا خراج ودکی نا خبرآک شینک کننگ انگ ئُ ہرافتے ٹی ہچ ئُ راستکی اس اف وخت اس کہ سیلز خراج نا شرح ٹی ودکی آن سیمنٹ نا فی گونی نرخ بیرہ 12روپئی اسکان ودک۔ اوپارے کہ حکومت خراج و ڈیوٹی تا کچ اٹی چنکو ودکی معاشی شونداری نا ہدف آتا دوئی کن کرینے۔ ملک انا شونداری کن اگہ بھاز کم بھاریم اس سگوئی تمے تو کروئی مرے انتئے کہ معاشی شونداری نا ہدف آک ننکن زیات اہم مریر۔ او بجٹ نا کوریج اٹی میڈیا نا مثبت کڑد انا ستائِ کرے۔ داوخت آ صحافی تا سوج آتا ورندی ئِ ترسا اسحاق ڈار پارے کہ مزورنا کم آن کم پنداوڑی جتا کڑدہ غاتون اوار صلابت آن پد مقرر کننگانے ولے دا معاملہ غا پین سجفنگ مریک۔ بزغر سیوت نا برانز نا بابت وزیر خزانہ پارے کہ اقتصادی ٹیم و اوفک تینے ہم شریدار آتون اوڑدہی کریر، اوفتے خواست آتا پورو کننگ نا یخین دہانی ہم کرفیسس کہ کشت و کشار کن تروک آ ریلیف پیکج ئِ برجاتخنگک و بجٹ اٹی پین آسراتی ہم تننگک ولے او بجٹ بننگ آن مست ہی روڈ آ پیش تمار۔ اوفتے بجٹ نا انتظار ئِ کروئی ئسک۔ اسہ پین سوج اسے نا ورندی ٹی اوپارے کہ بجٹ نا آڑاٹی گڑاتا نرخ آتا ودفنگ نا موکل تفننگک۔ بجٹ اٹی ہچ ئُ دُن ئُ گام اس کننگ تنے ہراڑآن نرخ آتیا زئم تمے، داچرجوئی ٹی وزارت نیشنل فوڈ سیکورٹی اینڈ ریسرچ آن بیدس تعلقدار انتظامیہ تون ہم رابطہ کننگک و اوفتے نرخ آتے کنٹرول اٹی تخنگ کن گام گیج کننگ نا پاننگک۔ وزیراعظم نا خصوصی کمکار ریونیو ہارون اختر خان م، بنجائی سیکرٹری خزانہ، سیکرٹری شماریات و ایلو بڑزکو کمامدارآک ہم داوخت آ ساڑی ئسر۔
